EO Izraıldiń Gazadaǵy áskerı operatsııasyn aıyptady

ASTANA.KAZINFORM — Bul týraly Eýropanyń syrtqy ister qyzmeti málim etti, dep habarlaıdy Kazinform agenttiginiń menshikti tilshisi. 

— Izraıldiń Gazadaǵy áskerı operatsııasy men beıbit turǵyndardyń qazasyna jol berýge bolmaıdy. Azamattyq ınfraqurylymǵa jasalyp jatqan shabýyldar esh qabyldanbaıdy. Biz atysty toqtatýǵa shaqyramyz, — delingen EO-nyń dıplomatııalyq qyzmeti málimdemesinde.

EO sondaı-aq gýmanıtarlyq kómek eshqashan saıasattandyrylmaýy nemese áskerılendirilmeýi kerek ekenin aıtty.

— Bul BUU-nyń gýmanıtarlyq kómekti bólýdegi rólin eske túsiredi. EO Gazadaǵy beıbit turǵyndardyń qajettilikterine sáıkes kólemde kómekti dereý, kedergisiz jáne turaqty túrde qalpyna keltirýge shuǵyl shaqyrýyn qaıtalaıdy.

EO basyp alynǵan Batys jaǵalaýda qonystanýshylar tarapynan jasalyp jatqan zorlyq-zombylyqty qatań aıyptaıdy. Qorqytý naýqandary, fızıkalyq jáne aýyzsha qysym, múlik pen úılerdi qıratý, órteý búkil palestınalyq qaýymdastyqtardy yǵystyryp jatyr.

Izraıl bul máseleni sheshý úshin dereý jáne batyl qadam jasap, osy qylmysqa jaýaptylardyń jaýapqa tartylýyn qamtamasyz etýi kerek.

— EO Ierýsalım kúni bolǵan oqıǵalardy, sonyń ishinde turǵyndar men jýrnalısterge zorlyq-zombylyq kórsetilýin aıyptaıdy. Izraıldiń saıası kóshbasshylarynyń osy turǵydaǵy arandatýshylyq áreketi Ierýsalım men onyń Eski qalasynyń erekshe mártebesi men sıpatyna nuqsan keltiredi, — delingen EO málimdemesinde.

Palestına sheneýnigi dúısenbi kúni AQSh-tyń Taıaý Shyǵys boıynsha arnaıy ókili Stıv Ýıtkofftyń atysty toqtatý usynysyna keliskenin aıtty.