EO elshisi vızalyq rásimderdi jeńildetý týraly kelisimniń qashan kúshine enetinin aıtty
ASTANA. KAZINFORM — Eýropalyq odaq pen Qazaqstan arasyndaǵy vızalyq rásimderdi jeńildetý jáne readmıssııa týraly kelisim boıynsha kelissózder aıaqtaldy. Alaıda qujatqa ázirge qol qoıylǵan joq. Bul týraly Qazaqstan Respýblıkasyndaǵy Eýropalyq odaq elshisi Aleshka Sımkıch jýrnalıstermen kezdesýde málim etti.
Aleshka Sımkıch qujattar keıin vıza máseleleri boıynsha túpkilikti sheshim qabyldaýǵa quzyretti Eýropalyq odaqqa múshe memleketterge joldanatynyn da atap ótti.
— Vızalyq rásimderdi jeńildetý jáne readmıssııa týraly kelisim boıynsha kelissózderdi aıaqtadyq. Biraq qujatqa áli qol qoıylǵan joq, sondyqtan ol ázirge kúshine engen joq. Endi kelisim Eýropalyq odaqqa múshe memleketterdiń qaraýyna jiberiledi. Vıza berý máselesi Eýropalyq komıssııanyń emes, EO-ǵa múshe memleketterdiń quzyretine jatady. Komıssııaǵa tek osy kelisim boıynsha kelissózder júrgizýge mandat berilgen bolatyn. Endi qujatty EO-qa múshe memleketter maquldap, resmı túrde bekitýi qajet, — dedi elshi.
Aleshka Sımkıchtiń aıtýynsha, kelisimdi bekitý rásimi birneshe aıǵa sozylýy múmkin.
— Naqty merzimin aıta almaımyn. Meniń oıymsha, bul birneshe aıǵa sozylady. Eýropalyq odaqtyń jumys tártibi osyndaı, bıýrokratııalyq rásimder de belgili bir ýaqytty talap etedi. Degenmen, bul úderis múmkindiginshe tezirek aıaqtalady dep úmittenemiz. Merzim máselesi bizdiń quzyretimizge kirmeıtindikten, naqty ýaqytyn aıtý qıyn, — dep túıindedi Aleshka Sımkıch.
Buǵan deıin Vızalyq talaptardy jeńildetý jónindegi kelissózder aıaqtalǵanyn jazǵanbyz.
