EO elderi munaı kompanııalarynyń ústeme paıdasyna salyq engizýdi usyndy
ASTANA. KAZINFORM — Germanııa, Italııa, Aýstrııa, Polsha, Portýgalııa jáne Ispanııa Eýropalyq odaqqa munaı kompanııalarynyń shamadan tys paıdasyna bir rettik salyq engizýdi usyndy. Mınıstrlerdiń pikirinshe, munaı men munaı ónimderi baǵasynyń kúrt ósýi energetıkalyq kompanııalarǵa qosymsha tabys ákelip otyr, dep habarlaıdy Le Figaro.
Bes eldiń qarjy mınıstri men Ispanııanyń ekonomıka mınıstri birlesken úndeýge qol qoıdy. Qujat Eýropalyq Odaq keńesine tóraǵalyq etip otyrǵan Irlandııanyń qarjy mınıstrine joldandy.
Úndeý avtorlary jańa alym engizý máselesin kelesi aıda Dýblınde ótetin EO elderi qarjy mınıstrleriniń kezdesý kún tártibine engizýdi usyndy.
Eýropalyq saıasatkerlerdiń pikirinshe, munaı kompanııalarynyń tabysy men rentabeldiligi shıki munaı baǵasyna qaraǵanda jyldamyraq ósip jatyr. Bul energetıka salasyna ómir súrý qunynyń ósýi kezeńinde qomaqty qosymsha tabys tabýǵa múmkindik beredi.
Energetıkalyq kompanııalardyń paıdasy aqpan aıynda AQSh pen Iran arasyndaǵy qaqtyǵys bastalǵannan keıin kúrt ósti. Álemdik munaı jetkizilimderiniń edáýir bóligi ótetin Ormýz buǵazy arqyly keme qatynasynyń qysqarýy energetıkalyq naryqtaǵy qysymdy kúsheıtti.
Buǵan deıin Tramp munaı kompanııalaryn joǵary paıda tapqany úshin synǵa alǵan bolatyn.
