EO bosqyndardy úshinshi elderde qabyldaý ortalyqtary týraly zań qabyldaıdy
ASTANA. KAZINFORM — Eýropalyq odaqqa múshe 27 eldiń ókilderi men Eýroparlament mıgranttarǵa baspana berý rásimderin odan ári qatańdatýdy jáne «qaýipsiz úshinshi elder» tujyrymdamasyn keńeıtýdi kózdeıtin jańa zań boıynsha kelisimge keldi. Bul týraly DW habarlady.
Eýropalyq qurylymdardyń málimetinshe, jańa zań EO-ǵa múshe memleketterge Eýropadan tysqary qaýipsiz eldermen kelisimder jasap, baspana suraý ótinishterin Odaq aýmaǵynan tys jerde qaraýǵa múmkindik beredi. Jyl sońyna deıin EO Keńesine tóraǵalyq etetin Danııanyń ımmıgratsııa jáne ıntegratsııa isteri jónindegi mınıstri Rasmýs Stoklýndtyń aıtýynsha, bul bastama rásimderdi Eýroodaq aýmaǵynan tysqary jerde ótkizýge quqyqtyq negiz qalyptastyrady.
Jańa norma EO quramyna kirmeıtin qaýipsiz elderdiń azamattarynan túsken ótinishterdi keri qaıtarýdy jeńildetedi. Ótinish berýshiniń jiberiletin elmen tikeleı baılanysynyń bolýy endi mindetti shart sanalmaıdy. Bul úshinshi elderde ornalastyrý jáne qaıtarý ortalyqtaryn qurýǵa jol ashady.
Mysal retinde Italııanyń mıgranttardy Albanııadaǵy ortalyqtarǵa ornalastyrý bastamasy keltiriledi. Uqsas sharalardy Nıderlandy da talqylap jatyr, bul el Ýgandada osyndaı ortalyq ashý múmkindigin baǵalaý alǵan. Germanııa da bul bastamaǵa qatysý múmkindigin qarastyryp otyr.
Qujatqa sáıkes, baspana izdeýshiler buryn bolmaǵan elderge de deportatsııalanýy múmkin, al ótinishi qabyldanbaǵandar apellıatsııalary qaralyp jatqan kezeńde avtomatty túrde EO aýmaǵynda qala almaıdy.
Sonymen qatar alǵash ret qaýipsiz elderden shyǵý tegi boıynsha biryńǵaı tizim jasalmaq. Oǵan Egıpet, Marokko, Týnıs, Úndistan, Kosovo, Bangladesh jáne Kolýmbııa engizilýi tıis. Bul elderdiń azamattaryna jedeldetilgen rásimder qarastyrylady, sonyń ishinde tikeleı shekaralarda jáne tranzıttik aımaqtarda. EO-ǵa múshelikke úmitker elder de soǵys pen adam quqyqtaryna júıeli qaterler bolmaǵan jaǵdaıda qaýipsiz elder retinde qarastyrylady.
Eske sala ketsek, Brıýsselde Eýroodaq kóshbasshylarynyń sammıti bastaldy.
Al Eýrokomıssııa 2035 jylǵa qaraı jańa kólikterge qoıylatyn ekologııalyq talaptardy jumsartpaq.