EO Armenııa ımportyna kedendik salyqtardy ýaqytsha toqtatady
ASTANA. KAZINFORM — Eýropa Odaǵy Armenııa ekonomıkasyna qoldaý kórsetý úshin osy elden ımporttalatyn taýarlarǵa salynatyn keden salyqtaryn ýaqytsha alyp tastaýǵa daıyndalyp jatyr, dep habarlaıdy Kazinform Anadolu agenttigine silteme jasap.
EO Keńesi Odaqqa múshe memleketterdiń Armenııa ónimderiniń saýdasyn yryqtandyrýǵa arnalǵan ýaqytsha sharalardy resmı túrde maquldaǵanyn habarlady.
Málimdemege sáıkes, jańa sharalar Armenııanyń EO-ǵa eksporttaıtyn taýarlarynyń shamamen 80%-yn qazirgi saýda shekteýlerinen bosatady. Birqatar taýarlardy, sonyń ishinde aýylsharýashylyq ónimderin ımporttaýǵa salynatyn kedendik bajdar eki jyl merzimge toqtatylady.
EO Keńesi ýaqytsha sharalar Armenııadan Eýropa Odaǵyna saýda aǵyndaryn qoldaýǵa jáne arttyrýǵa arnalǵanyn atap ótti. Sonymen qatar, eger Armenııa ónimderin ımporttaý EO óndirýshilerine teris áser ete bastasa, Brıýssel Odaq naryǵy úshin qorǵanys sharalaryn qabyldaı alady.
Buryn Eýropa Parlamenti bekitken erejeni EO Keńesi qabyldap, zańnamalyq protsedýrany aıaqtaǵan.
Qujat EO-nyń resmı jýrnalynda jarııalanǵannan kúnniń erteńine kúshine enedi jáne eki jyl boıy kúshinde bolady.
Eýropa Komıssııasynyń basshysy Ýrsýla fon der Lıaıen buǵan deıin EO Armenııa eksportynyń shamamen 80%-yn kedendik bajdan bosatý múmkindigin berýdi kózdep otyrǵanyn málimdegen bolatyn. Ol bul sharalardy Erevanda Armenııa premer-mınıstri Nıkol Pashınıanmen kezdesýden keıin jarııalaǵan.
