EO AQSh-qa qarsy 93 mlrd eýro jaýap bajdaryn daıyndap jatyr
ASTANA. KAZINFORM — EO Donald Tramptyń Grenlandııaǵa qatysty tarıfter engizilgeni týraly málimdemesi aıasynda AQSh-qa qarsy 93 mlrd eýro somasyna tarıfterin qosa alǵanda aýqymdy saýda sharalaryn qarastyrýǵa kiristi.
93 mlrd eýroǵa teń jaýap tarıfterin engizý EO shilde aıynda AQSh-pen saýda kelisimine qol qoıǵannan keıin toqtatqan sharalardyń qaıta bastalatynyn bildiredi.
Politico habarlaǵandaı, jeksenbi kúni Brıýsselde úsh saǵatqa sozylǵan kezdesý ótti. Oǵan blokqa múshe 27 memlekettiń dıplomattary qatysty. Kezdesý barysynda olar aldaǵy aptada Vashıngtonmen júrgiziletin kelissózder jyldam sheshimge kelmese, Trampqa qarsy naqty áreket nusqalaryn ázirleý mańyzdy ekenin atap ótti.
Birneshe sheneýniktiń aıtýynsha, balama nusqa retinde EO-nyń májbúrleýge qarsy quralyn (ACI) paıdalanýǵa bolady. Bul óz naryqtaryn geosaıası shantaj quraly retinde paıdalanatyn elderdi jazalaýǵa arnalǵan EO «saýda bazýkasynyń» bir túri.
Frantsııa prezıdenti Emmanıýel Makronnyń keńsesi elshilermen kezdesýde jarııalaǵan málimdemesinde prezıdent Eýrokomıssııa tóraıymy Ýrsýla fon der Lıaıen jáne NATO basshysy Mark Rıýtteimen sóıleskeni aıtylǵan. Ol eger AQSh tarıf engizý týraly qaterin júzege asyrsa, kúsh kórsetýge qarsy quraldy iske qosý arqyly «qatań, birtutas jáne úılestirilgen» eýropalyq jaýaptyń mańyzdylyǵyn rastaǵanyn bildirgen.
17 qańtarda Eýropalyq parlament AQSh pen EO arasyndaǵy saýda kelisimin toqtata turýǵa nıet etkenin bildirdi. Bul kelisim aıasynda Eýroodaqtan ımporttalatyn taýarlarǵa AQSh 15 paıyzdyq baj salyǵyn belgileıdi, al EO amerıkandyq eksportqa baj salyǵyn engizbeýge kelisedi.
Brıýsseldegi kelissóz AQSh prezıdenti EO-nyń alty eli, sondaı-aq Ulybrıtanııa men Norvegııaǵa qatysty 2026 jylǵy 1 aqpannan bastap AQSh-qa jetkiziletin barlyq taýarǵa 10% kóleminde tarıf salynatynyn, al 2026 jylǵy 1 maýsymnan bastap bul kórsetkish 25%-ǵa deıin ulǵaıatynyn jarııalaǵan soń uıymdastyryldy.
Eýropalyq keńestiń tóraǵasy Antonıý Kosta osy aptada EO kóshbasshylarynyń sammıtin shaqyratynyn málimdedi.
Budan basqa, eýropalyq kóshbasshylar osy aptada Shveıtsarııanyń Davos kýrorttyq qalasynda ótetin Dúnıejúzilik ekonomıkalyq forým aıasynda Tramppen kezdesedi.