EO Jobasy Qazaqstannyń memlekettik qyzmet máselelerin baıandaıtyn jýrnalıster arasynda konkýrs jarııalaıdy
ASTANA. 21 mamyr. QazAqparat - Eýropa Odaǵynyń «Qazaqstan Úkimeti memlekettik qyzmetin reformalaý men modernızatsııalaý» Jobasy 2013 jyldyń 21 mamyry men 1 qazany arasynda Qazaqstannyń memlekettik qyzmeti salasy jóninde úzdik habar taratý boıynsha shyǵarmashylyq konkýrs ótkizedi.
Konkýrs maqsaty - ortaq is - Qazaqstan Respýblıkasy memlekettik qyzmetin reformalaýǵa úles qosatyn avtorlardy anyqtap, olardy yntylandyrý.
Eki jeńimpazǵa bas júlde retinde QR Memlekettik basqarý akademııasy men QR Memlekettik qyzmet isteri Agenttigi sarapshylary qatysatyn oqytý sapary barysynda memlekettik qyzmet salasyndaǵy úzdik eýropalyq tájirıbemen tanysý múmkindigi berilmek.
«Konkýrstyq materıaldarǵa qoıylatyn talaptar:
- memlekettik qyzmet salasyn reformalaýdy obektıvti, ýaqtyly jáne júıeli túrde baıandaý;
- taqyrypty ashýdaǵy tereńdik pen onyń kópshilik oqyrmandar (kórermender, tyńdarmandar) úshin ózektiligi men mańyzdylyǵy;
- máselege kelýde kreatıvti tásilderdiń qoldanylýy;
- faktilerdi paıdalanýdaǵy dáldik pen naqtylyq;
Konkýrsqa usynylatyn materıaldardyń barlyǵy jarııalanǵan (baspasóz ben ınternet-BAQ úshin) nemese televızııalyq, radıo efırden (TV, radıo) berilgen bolýy kerek.
Jumystardy usynǵan kezde jarııalanǵan maqalalardyń skanerden ótkizilgen nusqasy (basylymdar materıaldary úshin), jarııalanǵan maqalalarǵa silteme (jelidegi materıaldar) nemese beıne, aýdıo materıaldar (televızııalyq, radıo materıaldar úshin) qosa berilýi kerek», delingen taratylǵan baspasóz habarlamasynda.
Ádil qazylar quramyna Eýropa Odaǵy jobasy, QR Memlekettik qyzmet ister Agenttigi, QR Memlekettik basqarý akademııasy sarapshylary enedi.
«Qazaqstan Úkimeti memlekettik qyzmetin reformalaý jáne modernızatsııalaý» Jobasy memlekettik basqarý salasyndaǵy eýropalyq tájirıbeni Qazaqstanda ıntegratsııalaý boıynsha halyqaralyq bastama jáne jobany Eýropa Odaǵy qarjylandyrady. Jobanyń basty maqsattaryna Memlekettik qyzmet isteri agenttigi men Qazaqstan Prezıdenti janyndaǵy memlekettik basqarý Akademııasynyń ınstıtýtsıonaldy áleýetin jetildirý men damytý jatady. Joba týraly tolyǵyraq aqparatty www.supportcsr.kz saıtynan alýǵa bolady.
