EO jobasy Qazaqstanda Ulttyq sý keńesi men Sý resýrstaryn qorǵaý agenttigin qurýdy usynady
ASTANA. Naýryzdyń 11-i. QazAqparat /Qanat Mámetqazyuly/ - Eýropalyq Odaqtyń «Qazaqstan Respýblıkasynda ekologııalyq saıasattyń quraldaryn engizý» atty jobasy Qazaqstanda Ulttyq sý keńesi men Sý resýrstaryn qorǵaý agenttigin qurýdy usynady. Bul týraly búgin QR Parlamenti Májilisinde atalǵan jobanyń tanystyrlymy barysynda bas sarapshy Bolat Esekın málim etti,
dep habarlaıdy QazAqparat.
Bas sarapshynyń aıtýynsha, EO jobasy boıynsha Qazaqstandaǵy sýdy basqarýdyń mártebesine qatysty úsh satyly usynymdar ázirlegen. Bunyń birinshisi, jedel atqarylýy tıis 3 jyldyq merzimdi qamtysa, ekinshisi 7 jyldyq ýaqytqa, úshinshisi uzaqmerzimdi kezeńge arnalyp otyr. «Sýdy basqarý ókilettiginiń mártebesin arttyrý úshin eń aldymen kóptegen damyǵan elderdiń tájirıbesine súıene otyryp - Ulttyq sý keńesin qurý qajet. Eýropalyq Odaqta bundaı biregeı Keńes tıimdi jumystar atqarýda ári onyń usynymdary únemi talqylaý sıpatyna ıe bolady. Bundaı ulttyq keńester TMD elderiniń birqatarynda qyzmet etedi. Al Qazaqstan úshin sý máselesi bolashaq ekonomıkalyq damýda mańyzdy orynǵa ıelenetin strategııalyq resýrs bolyp tabylady. Elimizdiń klımattyq jaǵdaıyn, sýmen qamtamasyz etilýin eskersek, aldaǵy jyldary ekonomıka men barlyq salaly ónerkásiptik damýdyń sýǵa qatysy bolatyny aıqyn boljanady», dedi B. Esekın.
Sonymen birge, bas sarapshy Qazaqstanda Sý resýrstaryn qorǵaý jónindegi agenttigin qurý qajettigin alǵa tartty. Onyń aıtýynsha, bundaı agenttik sý resýrstaryn qorǵaýǵa, sýdy tıimdi paıdalanýǵa qatysty sharalarmen aınalysýy tıis. «Eń bastysy agenttik ekologııalyq múddeler turǵysynda sýdy qorǵaýmen aınalysýy shart», dedi ol.
