EO jel men kún energııasynyń rekordtyq kólemin óndirip jatyr
BRıÝSSELЬ. QazAqparat – Jel jáne kún energııasy Eýropa Odaǵyndaǵy elektr energııasyn óndirýdiń jalpy kóleminiń rekordtyq 24%-yn qurady, dep habarlaıdy QazAqparat tilshisi CNN-ge silteme jasap.
E3G jáne Ember klımattyq taldaý ortalyqtarynyń esepterine sáıkes, jańartylatyn energııa kózderiniń ósýi EO-nyń 27 eline osy jyldyń naýryz-qyrkúıek aılary aralyǵynda gaz ımportynan 99 mıllıard eýro únemdeýge múmkindik berdi, bul ótken jyldyń sáıkes kezeńimen salystyrǵanda 11 mıllıard eýroǵa artyq.
Jańartylatyn energııa kózderiniń ósýi Reseı gazyna táýeldilikti tómendetýge baǵyttalǵan, onyń úlesi 2020 jyly EO ımportynyń 41%-yn qurady.
Esepke sáıkes, EO-ǵa múshe 27 memlekettiń 19-y naýryz aıynan bastap jel men kún energııasynyń rekordtyq óndirisine qol jetkizdi.
Polshada jyldyq eń joǵary paıyzdyq ósim 48,5% boldy, al Ispanııada óndiristiń eń úlken absolıýtti ósimi 7,4 teravatt-saǵat (Tvtsaǵ) tirkeldi. Tek Ispanııa ǵana 1,7 mıllıard eýro kóleminde gaz ımporty shyǵyndarynan qutyldy.
Osy jyldyń naýryzynan qyrkúıegine deıin jel men kúnnen búkil EO boıynsha 345 TVt/saǵ elektr qýaty óndirildi. Eger osy jazda qurǵaqshylyqqa baılanysty gıdroelektr energııasynyń óndirisi 21%-ǵa qysqarmasa, jańartylatyn energııa kózderiniń jalpy qýaty áldeqaıda joǵary bolar edi.
Alaıda, saraptamalyq ortalyqtar gazdyń úlesi sol kezeńde EO elektr energııasynyń shamamen 20%-yn quraǵanyn eskertti, bul shamamen 82 mıllıard eýro.
2022 jyldyń qyrkúıeginde energııa shyǵyndary ótken jylmen salystyrǵanda 40,8%-ǵa ósti, bul EO-daǵy ınflıatsııanyń jalpy kórsetkishteriniń 36%-yn qurady.
