EO jańa shekaralyq baqylaý erejelerin engizdi

ASTANA. KAZINFORM – 2025 jyldyń shilde aıynyń sońynan bastap Shengen aımaǵynda shekaralyq baqylaýdyń jańa erejeleri kúshine enedi, dep habarlaıdy AZƏRTAC.

Eýropalyq Odaqtyń Shengen aımaǵynyń syrtqy shekaralarynda 2025 jyldyń shilde aıynyń sońynan bastap shekaralyq baqylaýdyń jańa erejeleri kúshine enedi. 

EO Keńesiniń sheshimine sáıkes, Entry/Exit System (EES) – Kirý/Shyǵý júıesi dep atalatyn tsıfrlyq tirkeý júıesi kezeń-kezeńimen iske qosylady. Bul júıe Eýroodaqqa kirmeıtin elderdiń barlyq azamattary týraly málimetterdi EO-nyń syrtqy shekarasyn kesip ótken kezde avtomatty túrde tirkep otyrady.

Shekarada qandaı málimetter tirkeledi?

Júıe kelesi derekterdi avtomatty túrde jınaıdy:
aty-jóni
saýsaq izderi
bet sýreti (bıometrııalyq derekter)
kirý jáne shyǵý kúni men ýaqyty
shekara kesip ótken oryn

Jańa júıe vızamen keletin de, vızasyz sapar shegetin úshinshi elderdiń azamattaryna da qatysty qoldanylady.

EO Keńesiniń habarlaýynsha, bul jańashyldyqtar:
– qaýipsizdikti kúsheıtý,
– terrorızm men zańsyz mıgratsııaǵa qarsy kúres,
– ruqsat etilgen merzimnen artyq qalǵandardy anyqtaý,
– jalǵan qujattardy taný,
– EO elderi arasynda derektermen almasýdy jetildirý,
– qylmystyń aldyn alý men tergeýdi tıimdi júrgizý maqsatynda engizilip jatyr.

MTI agenttiginiń málimetinshe, EES júıesi aldaǵy alty aı ishinde kezeń-kezeńimen engiziletin bolady. Júıe Shengen aımaǵynyń barlyq syrtqy shekaralarynda – aeroporttarda, qurlyqtaǵy jáne teńizdegi shekara beketterinde iske asyrylady.

EO-ǵa kirmeıtin elderdiń azamattary (onyń ishinde Reseı, Ýkraına, Ulybrıtanııa jáne basqa elderdiń azamattary) úshin alǵashqy kirgen kezde bıometrııalyq málimetterdi jınaý saldarynan shekaralyq baqylaýdan ótý ýaqyty uzarýy múmkin. Alaıda bul aqparat keıin birińǵaı derekqorda saqtalyp, kelesi saparlarda qaıta qoldanylatyn bolady.