EO jańa ereje engizdi: endi otbasylar ushaqta qatar otyra alady
ASTANA. KAZINFORM — Eýroparlament áýe jolaýshylarynyń quqyqtaryn keńeıtetin jańa erejelerdi maquldady. Endi otbasylar ushaqta qatar ornalasqan oryndardy tegin tańdaı alady, al reıs keshikken jaǵdaıda ótemaqy tóleý tártibi saqtalady, dep habarlaıdy DW.
Jańa erejege sáıkes, balamen birge saparlaıtyn jolaýshylar ushaqtaǵy kórshiles oryndardy qosymsha aqysyz brondaı alady. Osyndaı múmkindik júrip-turýy shekteýli adamdardy ertip júretin azamattarǵa da beriledi.
Sondaı-aq áýe kompanııalary bılet qunyn qol júgin tasymaldaý aqysyn qosa eseptegendegi tolyq baǵamen birden kórsetýge mindetteledi. Bul jolaýshylarǵa jasyryn qosymsha tólemdersiz baǵalardy ońaı salystyrýǵa múmkindik beredi. Budan bólek, bılettegi aty-jóninde ketken qatelerdi túzetý de tegin bolady.
Sonymen qatar reıs keshikkeni úshin ótemaqy tóleý tártibi saqtalady. Eger ushaq tasymaldaýshynyń kinásinen úsh saǵattan artyq keshigip jetse, jolaýshylar ushý qashyqtyǵyna qaraı 250 eýrodan 600 eýroǵa deıin ótemaqy ala alady.
Dál osyndaı ótemaqy reıs ushýǵa 14 kúnnen az ýaqyt qalǵanda toqtatylyp, oǵan áýe kompanııasy jaýapty bolǵan jaǵdaıda da tólenedi.
Jolaýshylar ótemaqy talap etý týraly ótinishti toǵyz aı ishinde bere alady. Ótinish túskennen keıin áýe tasymaldaýshysy 30 kúntizbelik kún ishinde ótemaqyny tóleýge nemese bas tartý sebepterin jazbasha túrde túsindirýge mindetti.
Alaıda reıstiń keshigýi jolaýshylardyń agressıvti áreketterinen, qolaısyz aýa raıynan, tabıǵı apattardan nemese áýejaı men jerústi qyzmetteri qyzmetkerleriniń ereýilinen bolǵan jaǵdaıda áýe kompanııalary jaýapkershilikten bosatylady.
Jańa ózgeristerdiń taǵy biri — jolaýshylardyń balama baǵytpen qatynaý quqyǵy. Eger áýe kompanııasy úsh saǵat ishinde basqa baǵyt usynbasa, jolaýshy saparyn óz betinshe uıymdastyra alady. Mundaı jaǵdaıda tasymaldaýshy bastapqy bılet qunynyń 400 paıyzyna deıingi shyǵyndy óteýge mindetti.
Basylymnyń málimetinshe, jańa erejeler kúshine engennen keıin áýe kompanııalaryna olardy engizý úshin 12 aı ýaqyt beriledi. Osylaısha jańa normalar tolyq kólemde 2027 jyldyń jazynda qoldanysqa enedi.
Eske salaıyq, buǵan deıin Qazaqstan Qytaı men Qyrǵyzstanǵa jańa áýe reısterin iske qosqan bolatyn.
