EO uıaly baılanys jelilerinde Huawei jáne ZTE qurylǵylaryna tyıym salady

ASTANA. KAZINFORM — Eýropalyq Odaq qytaılyq Huawei jáne ZTE kompanııalarynyń qurylǵylaryn EO elderiniń uıaly baılanys jelilerinen tolyǵymen alyp tastaýǵa daıyndalyp jatyr, dep habarlaıdy BILD.

Eýrokomıssııa qaýipti dep sanalatyn shetelde jasalǵan jabdyqty paıdalanýǵa zańdy túrde tyıym salýǵa múmkindik beretin quqyqtyq bazany ázirleýge nıetti ekenin málimdedi.

Brıýssel bul sharalardyń negizgi sebepteri jeke jetkizýshiler tarapynan yqtımal tyńshylyq pen dıversııaǵa qatysty alańdaýshylyq ekenin atap ótedi. «Táýekel deńgeıi joǵary» sanattaǵy kompanııalar arnaıy tizimge ornalastyrylady. Olardyń jabdyqtaryn telekommýnıkatsııa jelilerinde paıdalanýǵa tyıym salynady, al qazir qoldanystaǵy qurylǵylardy bólshekteý jáne balama sheshimdermen aýystyrý talap etiledi.

Bolashaqta Eýropalyq Odaq táýekelderdi baǵalaýdyń uqsas mehanızmin tek 5G jelilerine ǵana emes, sonymen qatar basqa da mańyzdy sektorlarǵa, sonyń ishinde energetıka, kólik ınfraqurylymy jáne densaýlyq saqtaý nysandaryna taratýdy josparlap otyr. Qaýipsizdik týraly pikirtalastar jalǵasyp jatqanyna qaramastan, Huawei jáne ZTE qurylǵylary Germanııada jáne EO-nyń birneshe basqa elderinde keńinen qoldanylady. Negizgi alańdaýshylyq Qytaı bıliginiń osy kompanııalardyń qyzmetine yqtımal yqpalyna baǵyttalǵan.

Eýrokomıssııa kóptegen elder buryn qytaılyq jetkizýshilerden bas tartý jónindegi usynystardy elemegenin moıyndaıdy. Alaıda jańa quqyqtyq júıe mundaı talaptardy Odaqtyń barlyq músheleri úshin mindetti etýge tıis.

Osyǵan deıin elimizde respýblıkalyq jáne oblystyq mańyzy bar joldar mobıldi baılanyspen qamtylatyny týraly jazdyq. 

Sondaı-aq Transkaspıılik talshyqty-optıkalyq baılanys jelisi qashan iske qosylatyny týraly jazǵan bolatynbyz.