EO Úndistan men Pákistandy sabyr saqtaýǵa shaqyrdy
Eýropalyq odaq Kashmırdegi terrorıstik shabýyldy aıyptap, Úndistan men Pákistandy sabyrlyq pen dıalogqa shaqyrdy, dep habarlaıdy Anadoly.
Eýropalyq odaq (EO) Kashmırde 26 adamnyń ómirin qıǵan terrorıstik shabýyldy aıyptap, Úndistan men Pákistandy sabyr saqtap, dıalog ornatýǵa úndedi. Bul týraly Eýropalyq syrtqy áreket qyzmeti taratqan málimdemede aıtyldy.
— EO jáne onyń múshe memleketteri 22 sáýirde Kashmırde jasalǵan terrorıstik shabýyldy jáne jazyqsyz beıbit turǵyndardyń qaza tabýyn qatań aıyptaıdy, — delingen qujatta.
Brıýssel kinálilerdi jaýapkershilikke tartýǵa shaqyrdy.
Málimdemede Eýroodaq óńirdegi shıelenistiń kúsheıýi men qurbandar sanynyń artýyna alańdaýshylyq bildiretini atap ótilgen.
— EO eki tarapty sabyrlyq tanytýǵa, shıelenisti tómendetýge jáne beıbit turǵyndardyń ómirin saqtaý úshin kúsh qoldanýdan bas tartýǵa shaqyrady, — dedi EO.
Sondaı-aq qujatta Úndistan men Pákistanǵa halyqaralyq quqyqty saqtaý jáne beıbit turǵyndardy qorǵaý úshin barlyq múmkin sharany qabyldaý qajettigi aıtylǵan. EO qaqtyǵysty báseńdetý maqsatynda barlyq tarappen yntymaqtastyqqa daıyn ekenin jetkizdi.
Úndistannyń Pákistan aýmaǵyna jasaǵan soqqysy
6 mamyrda Úndistan 22 sáýirde Pahalgam aımaǵynda bolǵan teraktke jaýap retinde Pákistan men onyń baqylaýyndaǵy Azad Kashmır aýmaǵyna zymyran soqqylaryn jasady. Sol shabýylda 26 adam qaza tapty.
Úndistan tarapynyń málimetinshe, Nıý-Delı «terrorıstik ınfraqurylym» dep ataǵan toǵyz nysana joıylǵan. Al Pákistan bıligi bul shabýyldardan alty beıbit nysan zardap shekkenin jáne 26 adamnyń qurban bolǵanyn málimdedi.
Pákistan armııasy bes úndi áskerı ushaǵyn atyp túsirgenin habarlady, biraq Nıý-Delı bul aqparatty rastaǵan joq.
Úndistan premer-mınıstri Narendra Modı bul operatsııany «maqtanysh sáti» dep atap, úkimet ishinde oǵan «Sındýr operatsııasy» degen ataý berilgenin aıtty. Indýızm mádenıetinde «sındýr» — turmystaǵy áıelder mańdaıyna jaǵatyn qyzyl untaq.
Qosa ketsek, buǵan deıin SІM Úndistan men Pákistan arasyndaǵy jaǵdaıdyń shıelenisýine baılanysty málimdeme jasaǵan edi.