EO úkimetterge qorǵanys nesıelerin usyný josparyn alǵa tartyp otyr

ASTANA. KAZINFORM – Eýropalyq komıssııa prezıdenti Ýrsýla fon der Lıaıen beısenbi kúni Eýroodaqtyń tótenshe sammıtinde talqylanatyn Eýropalyq Odaqtyń buryn-sońdy bolmaǵan qorǵanys sharalary paketi týraly jarııalady.

Seısenbide, EO-nyń 27 ulttyq kóshbasshysy Brıýsselde shuǵyl jınalys ótkizetin EO sammıtine eki kún qalǵanda sóılegen sózinde Eýrokomıssııa tóraıymy Ýrsýla fon der Lıaıen úkimetter aldaǵy bes jylda qaryz túrinde 150 mlrd eýro alý múmkindigine ıe bolýy kerek ekenin málimdedi. 

Onyń aıtýynsha, bul habarlandyrý aldaǵy jyldary 800 mlrd eýroǵa deıin qosymsha qorǵanys shyǵyndaryn ashý úshin «Eýropany qaıta qarýlandyrý» josparynyń bir bóligi boldy.

— Biz mańyzdy jáne qaýipti kezeńde ómir súrip jatyrmyz. Men úshin biz tap bolyp júrgen qaýipterdiń aýyrlyǵyn nemese eger bul qaýipter oryndalsa, biz bastan keshýge týra keletin joıqyn zardaptardy sıpattaýdyń qajeti joq. Másele budan bylaı Eýropanyń qaýipsizdigine naqty qater bar ma nemese Eýropa qaýipsizdigi úshin úlken jaýapkershilikti óz moınyna alýy kerek pe degende emes. Shyndyǵynda, biz bul suraqtardyń jaýabyn kópten beri bilemiz. Bizdiń aldymyzda turǵan naqty suraq — Eýropa jaǵdaı talap etetindeı batyl áreket etýge daıyn ba, — dep atap ótti Ýrsýla fon der Lıaıen.

«Eýropany qaıta qarýlandyrý» jospary 5 áreketti qamtıdy:

* Ulttyq úkimetterge bıýdjetti qorǵanysqa jumsaıtyn bolsa, EO tapshylyǵy sheginen asyrýǵa ruqsat berý;
* Shyǵyndardy EO-nyń birlesken satyp alýlarymen biriktirý;
* EO bıýdjetin (biriktirý qorlary) qorǵanys shyǵyndary úshin paıdalaný;
* ESIU jáne Eýropalyq ınvestıtsııalyq bank arqyly jeke qarjyny jumyldyrý.

Aıta ketelik Búkilqytaılyq halyq ókilderi jınalysynyń (BHÓJ) baspasóz hatshysy Loý Tsıntszıan Qytaı men Eýropalyq Odaq (EO) arasynda túbegeıli múdde qaqtyǵysy da, bitispes geosaıası qaıshylyq ta joq ekenin málimdegen edi.