EO, Týnıs, Ózbekstan jáne Oman hýsıtterdiń Saýd Arabııasyna jasaǵan shabýylyn aıyptady
ASTANA. KAZINFORM — Hýsıtterdiń Saýd Arabııasyna zymyran jáne drondardy qoldana otyryp birneshe márte jasaǵan shabýylyna halyqaralyq qoǵamdastyq qarsylyq tanytty, dep habarlaıdy Kazinform agenttiginiń menshikti tilshisi.
Eýropa odaǵy, Týnıs, Ózbekstan jáne Oman hýsıtterdiń taıaýda Saýd Arabııasyna jasaǵan shabýylyn aıyptap, Saýd eline nıettestik bildirdi. Bul jóninde juma kúni Saýd baspa agenttigine silteme jasaı Asharq Al-Awsat basylymy jazdy.
EO beıbit turǵyndar men azamattyq ınfraqurylymǵa jasalǵan shabýyldar, sonyń ishinde Mekkege shabýyl jasaýǵa umtylý — óreskel áreket dep atady.
Brıýssel hýsıtterdi Iemendegi toqtatýǵa shaqyryp, áskerı áreketterdiń qaqtyǵysty saıası turǵydan retteýge kedergi keltiretinin jáne aımaqtyq qaýipsizdikke tónetin qaýipterdi kúsheıtetinin eskertti.
Týnıs, Ózbekstan jáne Oman bul shabýyldardy Saýd Arabııasynyń qaýipsizdigi men turaqtylyǵyna qaýip tóndirý, sondaı-aq onyń egemendigi men aýmaqtyq tutastyǵyn buzý dep atady. Atalǵan elder Saýd Koroldiginiń óz qaýipsizdigin qorǵaýǵa jáne teńizde júzý erkindigin qamtamasyz etýge baǵyttalǵan kúsh-jigerin qoldaıtynyn málimdedi.
Buǵan deıin hýsıtterdiń shabýylyn Iordanııa, Bahreın, Kýveıt, Mysyr, Pákistan jáne Túrkııa da aıyptaǵan bolatyn. Islam yntymaqtastyǵy uıymy, Musylman álemi lıgasy jáne Mysyrdyń Ál-Azhar ýnıversıteti de málimdemeler jasaǵan.
Eske sala keteıik, hýsıtter Saýd Arabııasynyń qalalaryna, áskerı nysandaryna jáne energetıkalyq ınfraqurylymdaryna birqatar shabýyl uıymdastyrǵan.
Taıf provıntsııasynda dron synyqtary bir adamnyń ólimine sebepshi boldy, taǵy eki adam jaralanǵan.
Saýd Arabııasy sonymen qatar seısenbi kúni eldiń áýe qorǵanys kúshteri Mekkeniń ońtústiginde qalanyń tyıym salynǵan áýe keńistigin buzyp kirmek bolǵan drondy joıǵanyn málimdedi.
Óz kezeginde, hýsıt qozǵalysynyń ókilderi Mekkege shabýyl jasaý áreketin joqqa shyǵaryp, olardyń kózdegeni áskerı jáne energetıkalyq nysandar bolǵanyn málimdedi.
Juma kúni hýsıtter ózderiniń baqylaýyndaǵy Iemen aýmaǵynda Saýd Arabııasynyń 37 áýe shabýyly bolǵanyn habarlady.
Hýsıtter Saýd Arabııasy Iemenge 37 ret áýe soqqysyn jasaǵanyn málimdedi
Nurlan Tuıaqov
