EO Tramptyń kedendik bajdaryna qarsy sharalar qabyldaýy múmkin ekenin málimdedi
ASTANA. KAZINFORM — AQSh-tyń Eýropalyq odaqtan ákelinetin taýarlarǵa 30 paıyzdyq baj salyǵyn engizý josparyna eýropalyq sheneýnikter men saıasatkerler qarsy pikir bildirdi. Germanııa ónerkásipshileri Aq úımen kelisimge kelýge shaqyrdy, dep habarlaıdy dw.com.
Eýrokomıssııa AQSh engizgeli otyrǵan bajdarǵa baılanysty Eýroodaq múddesin qorǵaıtynyn málimdedi.
— EO-dan keletin eksportqa 30 paıyzdyq baj engizý transatlantıkalyq jetkizý tizbekterin buzady, bul eki jaǵalaýdaǵy kásiporyndarǵa, tutynýshylarǵa jáne naýqastarǵa zııan tıgizedi, — dedi Eýrokomıssııa tóraǵasy Ýrsýla fon der Lıaıen.
Onyń bul pikirin Reuters agenttigi keltirgen. Donald Tramptyń EO taýarlaryna 1 tamyzdan bastap baj engizý sheshimi osylaı baǵalandy.
Fon der Lıaıen Brıýsseldiń AQSh-pen kelisimge kelý úshin 1 tamyzǵa deıin jumys isteýge daıyn ekenin aıtty.
— Biz Eýroodaqtyń múddelerin qorǵaý úshin qajet bolǵan jaǵdaıda laıyqty jaýaptyq sharalardy qabyldaýǵa daıynbyz, — dedi ol.
AQSh eks-prezıdenti Donald Tramp, óz kezeginde, eger EO amerıkalyq taýarlarǵa bajdy kóterse, Vashıngton da sımmetrııaly jaýap qaıtaratynyn málimdegen.
Eýropalyq keńes tóraǵasy Antonıý Koshta da Tramptyń sheshimine baılanysty Eýroodaqtyń «birtutas» kúıinde qalatynyn jáne óz múddelerin «qorǵaýǵa daıyn» ekenin aıtty.
— Baj salyqtary — bul salyqtyń bir túri. Olar ınflıatsııany kúsheıtedi, belgisizdik týǵyzyp, ekonomıkalyq ósimdi tejeıdi. Biz álem boıynsha senimdi saýda seriktestikterin qurýdy jalǵastyramyz, — dedi Koshta (Reuters).
«Biz barlyq taraptyń kelisimge kelýge degen nıetine senemiz. Batys álemin tutastaı nyǵaıtatyn ádil kelisim qajet. Qazirgi jaǵdaıda Atlantıka jaǵalaýyndaǵy eki taraptyń arasynda saýda soǵysyn qozdyrý orynsyz. Qazir basty nazar kelissózderge baǵyttalýy kerek», — dedi Italııa premer-mınıstri Djordja Melonı.
Nıderland premeri Dık Shof Tramptyń bul bastamasyn «alańdatarlyq ári bolashaqqa aparmaıtyn qadam» dep baǵalady.
— Eýrokomıssııa bizden tolyq qoldaý kútse bolady. Biz EO retinde birlik pen tabandylyq tanytyp, AQSh-pen ózara tıimdi nátıjege jetýge umtylýymyz kerek, — dedi ol.
Irlandııanyń syrtqy ister jáne saýda mınıstri Saımon Harrıs te EO-ny birlik saqtap, AQSh-pen kelissózge shoǵyrlanýǵa shaqyrdy.
— Ahýaldy shıelenistirip, EO-ǵa qarsy qosymsha bajdardy kóterýge jol bermeý kerek, — dedi ol.
Germanııa ónerkásipshileriniń federaldyq odaǵy (BDI) Germanııa úkimetin, Eýrokomıssııa men AQSh ákimshiligin «máseleni tez arada sheshý úshin obektıvti dıalog júrgizýge jáne shıelenisti ýshyqtyrmaýǵa» shaqyrdy.
— Prezıdent Tramptyń bul málimdemesi eki jaǵalaýdaǵy ónerkásipke úlken qaýip tóndiretin belgi, — dedi BDI basqarma múshesi Volfgang Nıdermark.
Germanııa avtokólik ónerkásibi qaýymdastyǵy (VDA) Tramptyń jańa sheshimderi avtokólik óndirýshileri men jetkizýshileriniń shyǵyndaryn arttyratynyn eskertti.
— Saýda qaqtyǵysynyń ýshyǵýy alańdatady. Búginniń ózinde kompanııalarymyzdyń shyǵyndary mıllıardtaǵan eýrony quraıdy jáne bul soma kún saıyn ósip keledi, — dedi qaýymdastyq prezıdenti Hıldegard Mıýller (Reuters keltirgen).