EO Tramp tarıfteri saldarynan 13,1 mlrd eýro shyǵynǵa ushyraýy múmkin

ASTANA. KAZINFORM – AQSh prezıdenti Donald Tramp amerıkalyq vıskıge 50 paıyzdyq baj salyǵyna jaýap retinde Eýropalyq Odaqtyń alkogol ónimderine 200 paıyzdyq baj salyǵyn engizetinin aıtyp qorqytty.

- Álemdegi eń jaýyz jáne qatygez salyq jáne tarıf organdarynyń biri Eýropalyq Odaq vıskıge jıirkenishti 50% baj salyǵyn engizdi. Eger bul tarıf dereý joıylmasa, AQSh jaqyn arada Frantsııadan jáne EO-ǵa múshe basqa elderden keletin barlyq sharapqa, shampanǵa jáne spırttik ishimdikterge 200% baj salyǵyn engizedi. Bul AQSh-taǵy sharap bıznesi úshin óte tıimdi bolady, - dep jazdy Donald Tramp Truth Social-da.

Halyqaralyq saýda ortalyǵynyń málimetinshe, Qurama Shtattar - eýropalyq alkogol óndirýshileri úshin eń mańyzdy eksporttyq baǵyt. 2024 jyly Amerıka EO-dan 13,1 mlrd eýroǵa alkogoldik sýsyndardy ımporttady, dep habarlaıdy Euronews.

Onyń 5,2 mlrd eýrosy sharapqa tıesili, bul EO-dan jalpy sharap eksportynyń shamamen 20%-yn quraıdy.

AQSh-qa eýropalyq eksporttyń jalpy kóleminiń 22%-yn quraıtyn 5,1 mlrd eýro somasyna spırttik ishimdikter eksporttaldy.

Shtattarǵa eksporttalatyn syranyń úlesi joǵary emes – 1,1 mlrd eýro, satylǵan jalpy kólemniń shamamen 12%-y.

Atap ótilgendeı, EO AQSh-tyń eýropalyq metaldarǵa engizgen baj salyǵyna jaýap retinde 2018 jyly alǵash ret amerıkalyq vıskıge 25% baj salyǵyn engizdi, bul AQSh-tyń Eýropaǵa alkogol eksportynyń kúrt tómendeýine ákeldi. Bul shara 2021 jyly toqtatyldy.

Buǵan deıin Tramptyń Kanadadan, Meksıkadan, Qytaıdan ımporttalatyn jańa tarıfteri kúshine engenin jazǵan bolatynbyz.

Odan keıin AQSh prezıdenti Donald Tramp Saýda mınıstrine Kanadadan ımporttalatyn bolat pen alıýmınııge 50 paıyzǵa deıin qosymsha baj salyǵyn engizýdi tapsyrǵanyn jarııalady.