EO Tramp ákimshiliginen alkogol, makaron jáne irimshikke salynatyn tarıfterden bosatýdy suraıdy

ASTANA. KAZINFORM — Eýropalyq komıssııa AQSh prezıdenti Donald Tramp ákimshiligine Eýropalyq odaq úshin mańyzdy birqatar taýardy amerıkalyq kedendik tarıfterden bosatý týraly ótinish joldamaq. Bul týraly Kazinform agenttiginiń menshikti tilshisi habarlady.

EO suraǵan taýarlar tizimi 27 betten turady jáne ol Politico basylymyna belgili bolǵan.

Brıýssel Vashıngton engizgen joǵary tarıfterden qorǵaǵysy keletin negizgi taýarlardyń arasynda pasta, irimshik, sharap, kúshti alkogol ónimderi, sondaı-aq záıtún maıy men kúnnen qorǵaıtyn kózildirikter bar.

Budan bólek, tizimge almazdar, qural-saımandar, metall qubyrlar, keme qozǵaltqyshtarynyń bólshekteri, óndiristik jabdyq, mata, aıaq kıim, bas kıimder, keramıka jáne ónerkásiptik robottar kirgen.

Bul tizim juma kúni EO elderimen kelisilip, dúısenbide AQSh-tyń saýda mınıstri Govard Lıýtnıkke jáne AQSh-tyń saýda ókili Djeımıson Grırge usynylady.

Atalǵan eksporttyq sektorlar Tramp pen Eýrokomıssııa tóraıymy Ýrsýla fon der Lıaıen shilde aıynda Shotlandııadaǵy Ternberrı golf-kýrortynda jasasqan saýda kelisimi aıasynda qamtylmaǵan.

Birlesken málimdemede egjeı-tegjeıli jazylǵan sol kelisim keıbir taýardy, mysaly ushaqtardy, tarıften bosatqanymen, kóptegen basqa eýropalyq taýarlarǵa 15 paıyzdyq tarıf engizdi. Al EO óz kezeginde AQSh-tyń ónerkásiptik taýarlaryna salynatyn barlyq tarıfterdi tolyq alyp tastaýǵa mindettengen.

EO-nyń makaron ónimderine salynǵan tarıfterdi alyp tastaý týraly ótinishi ásirese Italııa úshin ózekti. Óıtkeni bul elde sala qazir qıyndyqqa tap bolyp otyr: Tramp ákimshiligi 2026 jyldyń qańtarynan bastap antıdempıngtik is aıasynda makaronǵa 92 paıyzdyq tarıf engizýdi josparlap otyr. Bul qazirgi 15 paıyzdyq tarıften bólek eseptelip otyr.

Buǵan deıin Shveıtsarııa D. Tramp ákimshiliginen tarıfterdiń tómendetilýine qol jetkizgeni habarlanǵan edi.