EO temekige qarsy zańnamany qataıtýda
BRıÝSSELЬ. 18 jeltoqsan. QazAqparat - EO Keńesi temeki ónimderi óndirisi men satý ustanymdaryna, olardy oraý jáne 2016 jyly satýǵa shyǵarylatyn elektrondyq sıgaretterdi satý erejelerine jańa shekteýlerdi kelisti. Bul týraly EO Keńesiniń baspasóz qyzmeti habarlady.
Jańa erejeler boıynsha, sıgaret qorabynyń nemese kez kelgen temeki ónimderi oramasynyń 65 paıyz kólemi temekiniń zııany jóninde eskertpelermen qamtylýy tıis. Olarda mindetti túrde «Temeki shegý ólimge soqtyrady, tezirek tastańyz» jáne «Temeki tútininde qaterli isik týdyratyn 70-ten astam zat bar» degen jazýlar bolýy qajet. Keıbir elderdiń úkimetteri óz aýmaǵynda budan da qatań talaptar engize alady. Qazirgi kezde mundaı eskertýler temeki qorabynyń 30 paıyzyn ǵana qamtıtynyn atap ótken jón.
Taǵy bir mańyzdy jańalyqtardyń biri - hosh ıistendirgishterdi qosýǵa tyıym salýǵa qatysty. 2016 jyldan bastap Eýropada óndiriletin jáne satylatyn sıgaretterge vanıl men jemis ıisin qosýǵa, al 2020 jyldan - mentoldy sıgaretterge tyıym salynady. Eýrokomıssııa mundaı sheshim jastardyń, eń aldymen jas áıelderdiń temekige qushtarlyǵyn tómendetedi dep sanaıdy.
Densaýlyq saqtaý jáne tutynýshylar isteri jónindegi eýrokomıssar Tonıo Borg «neǵurlym iri jazylǵan eskertýler temeki shegýdiń densaýlyqqa keltiretin aýyr saldaryn eske salady jáne adamdardyń sanaly tańdaý jasaýyna kómektesedi», dep atap ótti.
Jańa dırektıva 1 ml kólemdegi kartrıdjinde nıkotın 20 mg-den aspaıtyn elektrondyq sıgaretterdi erkin satýǵa ruqsat beredi, bul jaǵdaıda olardyń kólemi 10 ml-den aspaýy tıis. Nıkotıni neǵurlym joǵary nemese kartrıdjder kólemi úlken elektrondyq sıgaretter dárihanalarda ǵana satylatyn bolady.
EO elderi ulttyq deńgeıde temeki ónimderin elektrondyq satýǵa, sonyń ishinde biryńǵaı eýropalyq qurylymnyń basqa elderine tapsyrys berýge tyıym salý quqyǵyna ıe boldy. Bul qaǵıda eýropalyq birtutas naryq ustanymdaryn tikeleı buzý bolyp tabylatynyna qaramastan, temeki ónimderine qatysty osyndaı erekshe tártip engizilip otyr.
