EO Taıaý Shyǵystaǵy energetıkalyq nysandarǵa shabýyldardy toqtatýdy talap etti
ASTANA. KAZINFORM – Brıýsselde ótken Eýropalyq Keńes sammıti sońǵy jyldardaǵy eń daýly sammıtterdiń biri boldy. Geosaıası qaqtyǵystar men energııa baǵasynyń ósýi EO-ǵa múshe 27 memleket basshysynyń kezdesýiniń kún tártibine áser etti, dep habarlaıdy Kazinform agenttiginiń Belgııadaǵy menshikti tilshisi.
Ortalyq másele AQSh pen Izraıldiń Iranǵa qarsy áskerı áreketteri aıasynda Taıaý Shyǵystaǵy jaǵdaı boldy.
Kóshbasshylar birlesken qorytyndylarynda «shıelenisti azaıtý jáne barynsha ustamdylyq tanytýdy», sondaı-aq «energetıka jáne sý nysandaryna qarsy soqqylarǵa moratorıı engizýdi» talap etti.
27 memleket jáne úkimet basshylary Ormýz buǵazy arqyly keme qatynasyn qalpyna keltirýdiń shuǵyl qajettiligi týraly keliskenimen, olar AQSh prezıdenti Donald Tramp talap etkendeı EO áskerı-teńiz mıssııasyn ornalastyrý «qajetti sharttar oryndalǵannan keıin» júzege asyrylýy kerek dep málimdedi.
EO kóshbasshylary «Iran BUU Qaýipsizdik Keńesiniń 2817 qararyna sáıkes aımaqtaǵy elderge qarsy áskerı shabýyldardy dereý toqtatýy kerek» dep anyq málimdedi.
Budan basqa, EO Iran ıadrolyq qarýǵa ıe bolmaýy kerek dep sanaıdy. Bul rette EO Tegerannan MAGATE-men tolyq yntymaqtastyqty jáne ıAdrolyq qarýdy taratpaý týraly shartty saqtaýdy talap etedi.
- Tegerandaǵy rejım óz halqyna qarsy zorlyq-zombylyq pen repressııany toqtatýy kerek. Biz Iran halqymen tolyq yntymaqtastyqta ekenimizdi jáne olardyń óz bolashaǵyn ózi anyqtaý quqyǵyn qoldaıtynymyzdy bildiremiz, - delingen qorytyndy málimdemede.
Sammıtte gýmanıtarlyq apat pen odan ári naryqtyq haostyń aldyn alý úshin aımaqtaǵy energetıkalyq jáne sý ınfraqurylymyna shabýyldarǵa ýaqytsha moratorıı engizý usynyldy. EO sondaı-aq dıplomatııalyq shıelenisti azaıtý jónindegi kúsh-jigerge úles qosýǵa daıyn ekenin bildirdi.
Osyǵan deıin BUU Bas hatshysy Antonıý Gýterrısh Brıýssel qalasyna baryp, Eýropalyq odaqqa múshe 27 eldiń basshylarymen kezdeskenin jazdyq.
