EO Somalıdiń egemendigin qurmetteýge shaqyrdy

ASTANA. KAZINFORM – Brıýsselde Izraıl «táýelsiz memleket» dep tanyǵan Somalılend pen Somalı arasyndaǵy kelispeýshilikterdi retteý úshin konstrýktıvti dıalogty qoldaıtynyn málimdedi. Al Mogadıshoda muny óz egemendigine «qasaqana qol suǵý» dep aıyptady, jazdy DW.

Eýropalyq odaq Izraıldiń Somalıdiń soltústigindegi Somalılend óńirin «táýelsiz memleket» retinde moıyndaýy aıasynda Somalıdiń egemendigin qurmetteý qajet ekenin alǵa tartty. Bul týraly Eýrokomıssııanyń ókili Anýar ál-Anýnı málimdedi.

Basylymnyń jazýynsha, Brıýsselde «Somalı Federatıvtik Respýblıkasynyń konstıtýtsııasyna, Afrıka odaǵy men Birikken Ulttar Uıymynyń jarǵylaryna sáıkes onyń birligine, egemendigine jáne aýmaqtyq tutastyǵyna qurmetpen qaraýdyń mańyzdylyǵyn taǵy da rastaıdy», — dep EK ókiliniń sózin AFP agenttigi keltirdi.

— Bul Afrıka Múıisi óńirindegi beıbitshilik pen turaqtylyq úshin asa mańyzdy. EO kóp jyldan beri jalǵasyp kele jatqan kelispeýshilikterdi retteý maqsatynda Somalılend pen Somalıdiń federaldyq úkimeti arasyndaǵy konstrýktıvti dıalogty qoldaıdy, — dep qosty Anýar ál-Anýnı.

Sondaı-aq Dohada Taıaý Shyǵys pen Afrıka elderiniń basym bóligin qamtıtyn 20-dan astam memleket pen Islam yntymaqtastyǵy uıymynyń birlesken málimdemesi jarııalandy. Qujatta Izraıldiń bul sheshimi «Afrıka Múıisi men Qyzyl teńiz aımaǵyndaǵy beıbitshilik pen qaýipsizdikke aýyr saldar ákelýi múmkin jáne jalpy halyqaralyq beıbitshilik pen qaýipsizdikke eleýli áser etedi» degen ýájben qabyldanbaıtyny aıtylǵan.

BUU Qaýipsizdik keńesi 29 jeltoqsanda atalǵan jaǵdaıǵa baılanysty shuǵyl otyrys ótkizedi.

Eske salaıyq, Shyǵys Afrıkadaǵy ózin-ózi jarııalaǵan Somalılend Respýblıkasy Izraıl tarapynan «táýelsiz ári egemen» memleket retinde tanyldy.

Aıta keteıik, BUU Somalıge qoldaý kórsetý úshin 1,6 mlrd dollarlyq gýmanıtarlyq josparyn iske qosty.