EO Sırııadaǵy jaǵdaıdy turaqtandyrý úshin sanktsııalardy toqtatady

ASTANA. KAZINFORM – Frantsııa syrtqy ister mınıstri Jan-Noel Barronyń málimdeýinshe, sanktsııalardyń jeńildetilýi energetıka, kólik jáne qarjy sektorlaryna áser etedi dep habarlaıdy Kazinform menshikti tilshisi.

Eýroodaq syrtqy ister mınıstrleri dúısenbi kúni Brıýsselde ótken kezdesýde Sırııaǵa salynǵan sanktsııalardy alyp tastaý máselesin talqylaı bastady.

- Sırııaǵa keletin bolsaq, búgin biz energetıka jáne kólik sektorlaryna, sondaı-aq eldiń ekonomıkasyn turaqtandyrýda mańyzdy ról atqaratyn qarjy mekemelerine qoldanylǵan keıbir sanktsııalardy alyp tastaý, toqtatý týraly sheshim qabyldaımyz, - dep málimdedi Barro otyrys aldynda.

Eýropalyq Odaqtyń syrtqy ister jáne qaýipsizdik saıasaty jónindegi joǵarǵy ókili Kaııa Kallas Reuters agenttigine sanktsııalardy jeńildetý týraly kelisimge qol jetkiziledi dep úmittenetinin málimdedi.

Buǵan deıin EO Sırııanyń jańa bıligin «ınklıýzıvti» saıası protsesti júzege asyrýǵa jáne adam quqyqtaryn, sonyń ishinde Sırııadaǵy etnıkalyq jáne dinı azshylyqtardyń quqyqtaryn qurmetteýge shaqyrdy. Brıýssel jáne basqa astanalar Damaskidegi «Haııat Tahrır ash-Sham» toby (HTSh – Qazaqstanda tyıym salynǵan uıym – red.) basqaratyn ýaqytsha úkimetpen tikeleı baılanys ornatyp úlgerdi.

Brıýsseldegi dıplomattar sheshim qabyldaý úshin konsensýs jetkilikti dep sanaıdy, biraq sanktsııalar tolyǵymen joıylmaıtynyn eskertti. Onyń ornyna olar ýaqytsha «toqtatylady» jáne eger HTSh ınklıýzıvti basqarý týraly ýádelerin oryndamasa, sanktsııalardy qalpyna keltirýi múmkin «qosalqy mehanızmmen» tolyqtyrylady.

Syrtqy ister mınıstrleriniń kezdesýi HTSh el úshin mańyzdy dep sanaıtyn sanktsııalardy jeńildetý týraly saıası kelisimge ákeledi dep kútilip otyr.

Búginde burynǵy prezıdent Bashar Asad bıligi kezinde salynǵan batys sanktsııalarynyń qatań rejımi onyń ekonomıkasyn álemniń qalǵan bóliginen ajyratyp otyr. Sırııada 13 jylǵa sozylǵan azamattyq soǵys kezinde batys memleketteri Sırııaǵa eksportty kúrt shektep, dıplomatııalyq jáne qarjylyq baılanystardy úzdi.

Eske sala ketsek, 2024 jyldyń 8 jeltoqsanynda Sırııa prezıdenti Bashar Asad el astanasynan ketip qaldy.