EO saýda soǵysyna jyldam toıtarys berý joldaryn qarastyrmaq
ASTANA. KAZINFORM — Frantsııa prezıdenti Emmanýel Makron men Germanııa kantsleri Frıdrıh Merts Eýropa komıssııasynyń prezıdenti Ýrsýla fon der Lıaıenge birlesken hat joldap, Brıýsselge saýda soǵysyna bastalǵanda jedel áreket etýge múmkindik beretin jańa qural ázirleýdi surady, dep habarlaıdy Kazinform agenttiginiń EO-daǵy menshikti tilshisi.
Eýropa BAQ-tary tanysyp shyqqan hatta EO-nyń eki alpaýytynyń kóshbasshylary tikeleı Qytaıdy atap otyrǵan joq. Degenmen, usynystar Beıjińmen saýda EO úshin qıyndaı túsken tusynda, Eýroodaqtyń saýda komıssary Marosh Shefchovıchtiń Beıjińdegi kelissózderi aldynda jasalyp otyr.
Parıj ben Berlın EO-nyń saýda qysymyna qarsy turýǵa arnalǵan sharalary tym baıaý dep sanaıdy. Atap aıtqanda, 2023 jyly qabyldanǵan ekonomıkalyq májbúrleýge qarsy turý quraly áli kúnge qoldanylmaǵan.
Ideıa avtorlarynyń pikirinshe, jańa qural Eýropa komıssııasyna EO-ǵa qarsy saýda soǵysyn júrgizip jatqan el úshin birneshe kún ishinde taýarlar men qyzmetterdiń biryńǵaı naryǵyna kirýdi shekteýge nemese tolyǵymen tyıyp tastaýǵa múmkindik beredi. Mysaly, asa mańyzdy shıkizat jetkizilimin toqtatý múmkindigin qoldanýǵa bolady. Múshe memleketterdiń basym kópshiligi qarsy bolmasa, Komıssııanyń sheshimi jaramdy bolýy qajet.
Germanııa sheneýnikteri bul mehanızmdi «salystyrmaly zalal keltirý» múmkindigi dep sıpattap júr. Eýropalyq dıplomattar tótenshe jaǵdaıǵa toıtarys berý «túımesi» týraly aıtyp júr. Frantsııanyń Elıseı saraıy bul bastamany «ańqaýlyqtan shyǵý» talabymen baılanystyryp otyr, EO músheleriniń kópshiligi syrttaǵy alpaýyt elmen saýdanyń «shydaýǵa bolmaıtyndaı sıpat ala bastady» degen oıǵa kele bastady.
Brıýsseldiń baǵalaýy boıynsha, ótken jyly EO-nyń Qytaımen saýda tapshylyǵy shamamen 360 mıllıard, ıaǵnı táýligine shamamen 1 mıllıard eýroǵa jetken. Eýropa tarapy muny Qytaıdyń sýbsıdııalanatyn ónerkásiptik qýatynyń shamadan tys bolýymen baılanystyrady, bul avtomobıl, hımııa, bolat jáne akkýmýlıator salalaryna qysym jasap keledi. Odaqtyń Qytaıdyń sırek kezdesetin metaldar men magnıtterge táýeldiligi erekshe atap ótiledi.
Frantsııa men Germanııanyń usynystary qazan aıynyń ortasynda Brıýsselde ótetin EO memleket jáne úkimet basshylarynyń sammıtine usynylmaq.
Eýropa komıssııasy jyl sońyna deıin óz sharalaryn ázirlemek. Germanııa óz avtoónerkásibiniń Qytaı naryǵyndaǵy múddelerine baılanysty buǵan deıin qatań sharalar qabyldaýǵa saqtyqpen qaraıtyn, endigi tańda Berlınniń ózi osy bastamaǵa muryndyq bolyp otyrǵanyn Brıýssel Germanııa ustanymynyń ózgerýiniń belgisi retinde qarastyryp otyr.
Qytaı EO-men saýda kelissózderi qarsańynda ımportqa qatysty tergeý bastady.
