EO sarapshysy Qazaqstannyń JI zańyn joǵary baǵalady

ASTANA. KAZINFORM – Májilistegi Parlamenttik tyńdalymda Dúnıejúzilik ekonomıkalyq forýmnyń sarapshysy Henrık fon Sheıl Qazaqstannyń tsıfrlandyrý salasyndaǵy qadamdaryn joǵary baǵalady.

Ol «Jasandy ıntellekt týraly» qabyldanǵan zańdy azamattar men memleketti qorǵaýǵa baǵyttalǵan alǵashqy qadam dep atap ótti.

Eýropada jasandy ıntellekt salasyndaǵy zańnamalar avtorlarynyń biri sanalatyn Henrık fon Sheıl sońǵy jyldary Qazaqstan ekonomıka salasynda aıtarlyqtaı jetistikke jetip, memleket pen qoǵam arasyndaǵy baılanystardy nyǵaıtqanyn atap ótti.

– Bul – maqtanýǵa turarlyq jaǵdaı. Aldaǵy on jylda jasandy ıntellekt Qazaqstandy túbegeıli ózgertedi. Sizderdiń osy salaǵa qazirden bastap erekshe kóńil bólip jatqandaryńyz óte quptarlyq. Álemniń túkpir-túkpirindegi JI zańnamalaryn zertteı kele, Qazaqstan tájirıbesi meni tańǵaldyrǵanyn aıta alamyn. Sebebi sizder Eýropalyq Odaqtyń eń ozyq tájirıbesin qoldana otyryp, táýekelderdi baǵalaı aldyńyzdar. Naryqtyń ashyqtyǵy men aıqyndyǵyn qamtamasyz etý joldaryn oılastyrdyńyzdar jáne eń bastysy – adam quqyqtaryn qorǵaýdy basty nazarǵa qoıdyńyzdar, – dedi sarapshy.

Tyńdalym barysynda Jasandy ıntellekt jáne tsıfrlyq damý mınıstriniń mindetin atqarýshy Jaslan Mádıev, Ǵylym jáne joǵary bilim mınıstri Saıasat Nurbek, Májilis depýtaty Ekaterına Smyshlıaeva, IT-kompanııalardyń ókilderi men sarapshylar sóz sóıledi.

Parlamenttik tyńdalym aıasynda jasandy ıntellekt, tsıfrlyq tehnologııalar jáne ınnovatsııalar salasyndaǵy jobalar kórmesi ótti. Onda memlekettik organdar men IT-kompanııalar 20-dan astam jańashyldyqpen tanystyrdy. Jobalar memlekettik qyzmetter men quqyq qorǵaý júıesinen bastap, medıtsına, bilim, logıstıka jáne qurylysqa deıingi túrli baǵyttardy qamtydy.

Aıta keteıik, Májilis tóraǵasy Erlan Qoshanov bizge jasandy ıntellektiniń qazaqstandyq modeli qajet ekenin aıtty.