EO sanktsııalar jónindegi arnaıy ókili: Byltyrdan beri Qazaqstanmen aıtarlyqtaı ilgerileýge qol jetkizdik
ASTANA. KAZINFORM – Eýropalyq Odaqtyń sanktsııalar jónindegi arnaıy ókili Devıd O'Sallıvan Astanada ótken baspasóz konferentsııada Qazaqstanmen aradaǵy qarym-qatynastyń bir jylǵy jumysynyń qorytyndysyn málim etti.
«Meniń Qazaqstanǵa Ulybrıtanııa men AQSh-tan kelgen áriptesterimmen birge jasaǵan saparymnan beri Qazaqstannan 50 taýardyń túrine erekshe mán berýdi suraǵanbyz. Bul sanktsııaǵa ilingen taýarlar men buıymdardyń eń bir az bólshegi deýge bolady. Men ol 50 túrli taýardy «maıdan alańynan tabylǵan buıymdar» dep ataǵandy jón kóremin. Óıtkeni ol buıymdardyń bizdiń ýkraınalyq áriptesterimiz maıdan alańyndaǵy reseılik qarý-jaraqtardan tapqan. Bul jerde osy 50 túrli taýar atalymy jalpy taýar aınalymynyń 1 paıyzyn ǵana quraıtynyn aıtqym keledi. Bul buıymdardyń úlesi jalpy kólemi boıynsha da, baǵasy boıynsha da óte shaǵyn. Biraq olardyń qarýlaný isinde qundylyǵy bar jáne soǵysta destrýktıvtik búldirgish sıpatqa ıe», - dedi Eýropalyq Odaq ókili.
Sondaı-aq, ol byltyr saparynan keıin Reseı men Qazaqstan arasyndaǵy taýar aınalymy udaıy baqylaýda ekenin aıtty.
«Bul máselede byltyrǵy 1 sáýirden beri belgili bir ilgerileýge qol jetkizgenimizdi atap ótkim keledi. Biz atalǵan buıymdardyń Qazaqstan arqyly jasalǵan ımport jáne reeksport kórsetkishteri aıtarlyqtaı túskenin kórip otyrmyz. ıAǵnı, bul jerde jaǵymdy ilgerileý aıqyn kórinip tur. Biraq óz tájirıbeme súıenip bul baǵyttaǵy jumys únemi kúsh salyp, udaıy qaıta qarap otyrýdy qajet etedi», - dedi Devıd O'Sallıvan.
