EO Reseımen, Belarýspen jáne Ýkraınamen shekaralas elderin qoldaýdy kúsheıtedi

ASTANA. KAZINFORM — Eýrokomıssııanyń vıtse-prezıdenti Raffaele Fıtto Eýroodaqtyń shyǵys shekaralas aımaqtaryna qatysty arnaıy strategııasyn tanystyrdy. Bul týraly DW habarlady.

Qujat toǵyz elge qatysty: Estonııa, Latvııa, Lıtva, Fınlıandııa, Polsha, Slovakııa, Vengrııa jáne Rýmynııa. Onda Reseıdiń Ýkraınaǵa qarsy soǵysynyń saldaryn óteý maqsatynda mıllıardtyq nesıeler bólý qarastyrylǵan.

Osy maqsatta EastInvest ınvestıtsııalyq platformasy qurylady, ol zardap shekken óńirlerdegi kásiporyndar men jergilikti bılik organdarynyń qarjylandyrýǵa qol jetkizýin jeńildetedi. Platforma 26 aqpanda jumysyn bastaıdy.

Eýrokomıssııanyń málimetinshe, qoldaý kórsetiletin óńirler Ýkraınadaǵy soǵys saldarynan týyndaǵan halyqtyń kóship ketýi, ekonomıkalyq ósimniń tómendeýi jáne ınflıatsııanyń kúsheıýi sııaqty problemalardan zardap shegip otyr.

«Soǵys bastalǵaly beri buryn qalypty kúndelikti ómirge, shekaraaralyq saýdaǵa jáne týrızmge arnalǵan oryndar qazir qaýipsizdik maqsatynda, qos maqsattaǵy qyzmetke, logıstıkaǵa, drondar men shuǵyl qoldaý kórsetýge paıdalanylyp jatyr», dedi Fıtto.

Aıta keteıik, buǵan deıin Eýroodaq elderi Ýkraınaǵa 90 mıllıard eýro nesıe beretinin jazdyq.