EO Reseıge qarsy 19-shy sanktsııalar paketin talqylaý úshin AQSh-qa delegatsııa jiberedi
BRıÝSSELЬ. KAZINFORM — Eýropalyq Odaq (EO) Reseıge qarsy jańa, 19-shy sanktsııalar paketi boıynsha jumysty jandandyryp, osy maqsatta AQSh-qa arnaıy delegatsııa jibermek. Bul týraly Eýropalyq Keńestiń tóraǵasy Antonıý Koshta Ýkraına prezıdenti Vladımır Zelenskıımen Ýjgorodta ótken birlesken baspasóz máslıhatynda málimdedi, dep jazdy Anadoly.
Ýkraınanyń batys óńirlerine alǵash ret saparmen kelgen Koshta bul aımaq bolashaqta «shekaralyq aımaq» emes, eldiń EO-ǵa múshe bolǵannan keıin onyń tolyqqandy bóligine aınalatynyn atap ótti.
Onyń aıtýynsha, Ýkraınanyń tolyqqandy EO músheligi «qaýipsizdiktiń senimdi kepili» ári ýkraın halqynyń gúldenýi men ál-aýqaty úshin «jaqsy bolashaqtyń» negizi bolady.
Eýropalyq Keńes tóraǵasy jazda qaıta jandanǵan dıplomatııalyq bastamalar men Alıaskada ótken sammıtti eske saldy. Ol sondaı-aq Ýkraına AQSh prezıdenti Donald Tramptyń beıbit kelissózder bastaý týraly usynysyna keliskenin aıtty.
— Biz soǵystan keıin jańa shabýyldardyń aldyn alý úshin senimdi qaýipsizdik kepildikterin berýge tolyq daıynbyz, — dedi Koshta.
Sondaı-aq ol aldyńǵy kúni Parıjde ótken kezdesýde EO-nyń 26 eli men «eriktiler koalıtsııasynyń» Ýkraınadaǵy atysty toqtatý rejımin qamtamasyz etý úshin óz kúshterin ornalastyrýǵa daıyn ekenin rastaǵanyn aıtty.
— Koalıtsııa tek daıyn emes, sonymen qatar ony iske asyrýǵa qabiletti ekenin kórsetti, — dep atap ótti Koshta.
Sonymen birge, ol Reseıge qysymdy kúsheıtý qajettigin atap ótip, Brıýsselde jańa sanktsııalar paketi boıynsha jumys jalǵasyp jatqanyn jáne osyǵan baılanysty EO delegatsııasy Vashıngtonǵa baratynyn málimdedi.
2022 jyldyń aqpanynda Ýkraınada qaqtyǵys bastalǵaly beri EO Reseıge qarsy 18 ekonomıkalyq sanktsııalar paketin bekitti. Brıýssel Máskeýdiń beıbit bastamalarǵa shynaıy qaramaıtynyn alǵa tartyp, dıplomatııalyq protsesti qoldaı otyryp, sonymen qatar 19-shy shekteý sharalary paketin ázirlep jatyr.
Eske sala keteıik, buǵan deıin AQSh Reseıge qarsy sanktsııalardyń bir bóligin 20 tamyzǵa deıin ýaqytsha toqtatqanyn jazǵan edik.