EO prokýratýrasy alaıaqtyq boıynsha kúdikke ilingen 11 depýtatty jaýapqa tartýdy surady
ASTANA.KAZINFORM — Eýropalyq Odaqtyń Bas prokýratýrasy (EPPO) Grekııa parlamentinen 11 depýtattyń ımmýnıtetin alyp tastaýdy surady. Bul ótinish aýyl sharýashylyǵyna bólinetin EO qorlarymen baılanysty yqtımal alaıaqtyqty tergeý aıasynda jasalǵan. Bul týraly Grekııanyń ERT-news telearnasyna silteme jasaı otyryp, BELTA jazdy.
Belgili bolǵandaı aýyl sharýashylyǵy sýbsıdııalaryn zańsyz paıdalaný boıynsha uıymdasqan shemaǵa memlekettik qyzmetkerler de qatysqan. Atap aıtqanda, tólemderdi bólý men qoǵamdyq kómekti baqylaýǵa jaýapty uıym qyzmetkerleri kúdikke ilingen. Sonymen qatar, tergeý Grekııa parlamentiniń burynǵy bes depýtatyna qatysty da júrgizilip jatyr.
Immýnıtetten aıyrylýy múmkin depýtattardyń esimderi ázirge jarııalanǵan joq. Alaıda olardyń kópshiligi premer-mınıstr Kırıakos Mıtsotakıs basqaratyn «Jańa demokratııa» partııasynyń ókilderi ekeni belgili. Prokýratýra depýtattardy tergeý barysynda túsinikteme berýi úshin olardyń ımmýnıtetin alyp tastaýdy suraǵan.
Ótinish 2021 jyly jasaldy dep boljanǵan áreketterge qatysty. Tergeý EO-nyń qarjylyq múddelerine qarsy baǵyttalǵan aýyr jáne jeńil qylmystardy qamtıdy. Olardyń ishinde senimdi teris paıdalaný, elektrondy alaıaqtyq jáne úshinshi tulǵalarǵa zańsyz paıda ákelý maqsatynda jalǵan málimet berý bar.
Sonymen qatar, burynǵy aýyl sharýashylyǵy jáne azyq-túlik mınıstri men onyń orynbasarynyń da qyzmet barysynda alaıaqtyq shemaǵa qatysy bolýy múmkin ekeni aıtyldy.
Grekııa úkimetiniń resmı ókili Pavlos Marınakıs: «Árbir jaǵdaıdy jeke qarastyrý úshin is materıaldarynyń parlamentke berilýin kútip otyrmyz», – dedi.
2025 jyldyń kókteminde EO prokýratýrasy aýyl sharýashylyǵy qorlarymen alaıaqtyq jasady degen kúdikpen 100 grek fermerine aıyp taqqan bolatyn. Keltirilgen shyǵyn shamamen 2,9 mıllıon eýroǵa baǵalanǵan. Politico basylymynyń málimetinshe, 2017 jyldan beri keıbir Grekııa azamattary ózderine tıesili emes jerlerge nemese múlde júrgizilmegen aýyl sharýashylyǵy jumystaryna sýbsıdııa alǵan.
Grekııanyń ózinde de júzdegen adamnyń EO sýbsıdııalaryn zańsyz alǵany týraly janjalǵa baılanysty tergeý júrgizildi. 2025 jyldyń qazan aıynda uıymdasqan qylmysqa qarsy kúres basqarmasy arnaıy operatsııa ótkizip, 37 adamdy ustady.
Euronews málimetinshe, bul alaıaqtyqtyń áshkerelenýi Grekııada úlken rezonans týdyryp, fermerlerdiń jappaı narazylyǵyna sebep boldy. Óıtkeni bul jaǵdaı aýyl sharýashylyǵy sýbsıdııalarynyń keshiktirilýine ákelgen.
Aıta keteıik, Eýropalyq Odaq Izraıldegi ólim jazasy týraly zańǵa alańdaýshylyq bildirdi.
