EO Ormýz buǵazyndaǵy jaǵdaıǵa baılanysty Iranǵa qarsy sanktsııalar engizýdi josparlap otyr
ASTANA. KAZINFORM — Eýropalyq odaq mamyr aıynda Iranǵa qarsy jańa sanktsııalar paketin bekitýdi josparlap otyr. Bul týraly Eýropalyq dıplomatııalyq qyzmet basshysy Kaıa Kallas RIA Novostı agenttigine bergen suhbatynda málimdedi, dep BELTA jazdy.
— Bizde Iranǵa qatysty qazirdiń ózinde aýqymdy sanktsııalar bar. Jańa usynys Ormýz buǵazynda keme qatynasyn shekteýge qatysy bar tulǵalarǵa baǵyttalǵan. Bul sanktsııalar boıynsha jumys júrip jatyr, saıası kelisimge qol jetkizildi. Olardy kelesi Syrtqy ister mınıstrleri keńesiniń otyrysynda mamyr aıynda qabyldaýdy kózdep otyrmyz, — dedi Kallas.
28 aqpanda AQSh pen Izraıl Iranǵa qarsy áskerı áreketter bastaǵany habarlandy. Sonyń saldarynan Tegerandy qosa alǵanda, Irannyń iri qalalary soqqyǵa ushyraǵan. Sondaı-aq Ormýz buǵazy arqyly ótetin kemelerge de shabýyl jasalǵan.
7 sáýirde AQSh bıligi Iranmen ózara eki aptalyq atysty toqtatý týraly jarııalady. Alaıda 11 sáýirdegi AQSh–Iran kelissózderinen keıin 13 sáýirde AQSh Ortalyq qolbasshylyǵy Iranǵa teńiz blokadasy engizilgenin habarlady. Bul shara Iran porttaryna baratyn jáne olardan shyǵatyn barlyq kemelerdiń qozǵalysyn shektedi.
Al Iran Islam revolıýtsııasy Saqshylar korpýsynyń birikken áskerı qolbasshylyǵy AQSh blokadasyna jaýap retinde Ormýz buǵazynda áskerı baqylaý rejımi qaıta ornatylǵanyn málimdedi.
Aıta keteıik, Iran Ormýz buǵazy arqyly tranzıt úshin esep aıyrysýdy rıalmen júrgizýdi usyndy.
