EO Ormýz buǵazyndaǵy daǵdarysqa baılanysty ekonomıkalyq ósim boljamyn tómendetti
ASTANA. KAZINFORM – Eýrokomıssııa Ormýz buǵazyndaǵy daǵdarys pen energııa tasymaldaýshylar baǵasynyń qymbattaýyna baılanysty Eýroodaq ekonomıkasynyń 2026 jylǵa arnalǵan ósim boljamyn tómendetti, dep habarlaıdy Euronews.
Brıýsseldiń jańartylǵan boljamyna sáıkes, EO ekonomıkasy bıyl 1,1%-ǵa ǵana ósedi. Buǵan deıingi kúzgi boljamda bul kórsetkish 1,4% deńgeıinde bolǵan.
Al eýroaımaq boıynsha ósim boljamy 0,9%-ǵa deıin tómendetildi.
Eýrokomıssııa baıandamasynda Ormýz buǵazy tóńiregindegi shıelenis álemdik energetıkalyq naryqtardyń jumysyna keri áser etip, Eýropanyń ekonomıkalyq perspektıvalaryn aıtarlyqtaı nasharlatqany aıtylǵan.
– 2026 jyldyń aqpan aıynyń sońyna deıin EO ekonomıkasy baıaý ósim kórsetip, ınflıatsııa tómendeıdi dep kútilgen edi. Alaıda qaqtyǵys bastalǵaly boljam aıtarlyqtaı ózgerdi, – delingen qujatta.
Sarapshylar Ormýz buǵazyndaǵy jaǵdaı munaı men gaz baǵasynyń kúrt ósýine sebep bolyp, Eýropada ınflıatsııanyń jedeldeýine alyp keletinin boljady.
Qazir EO boıynsha ınflıatsııa 3,1%-ǵa deıin jetedi dep kútilip otyr. Bul burynǵy boljamnan bir paıyzdyq tarmaqqa joǵary.
Eýrokomıssııa qazirgi jaǵdaıdy 2022 jylǵy Reseı men Ýkraına arasyndaǵy soǵystan keıingi energetıkalyq daǵdaryspen salystyrdy.
– Bul sońǵy bes jyldaǵy ekinshi iri energetıkalyq soqqy, – dep málimdedi komıssııa ókilderi.
Qujatta Eýropanyń ımporttyq qazba otyndaryna táýeldiligi geosaıası shıelenister kezinde odaqty álsiz etetini atap ótilgen.
Boljam boıynsha, tutynýshylar senimi ındeksi sońǵy 40 aıdaǵy eń tómengi deńgeıge túsken. Turǵyndar kommýnaldyq tólemderdiń qymbattaýynan qaýiptense, bıznes shyǵyndardyń ósýi men suranystyń tómendeýine tap bolyp otyr.
Sondaı-aq ınvestıtsııa kólemi qysqaryp, eksport ósimi baıaýlaıdy dep kútiledi.
Soǵan qaramastan, Brıýssel Eýroodaqtyń qazirgi jaǵdaıǵa 2022 jylmen salystyrǵanda jaqsyraq daıyn ekenin málimdedi. Buǵan jańartylatyn energııa kózderine salynǵan ınvestıtsııalar, gaz tutynýdyń azaıýy jáne energııa jetkizýdi ártaraptandyrý sharalary áser etken.
– Energııa kózderin ártaraptandyrý, dekarbonızatsııa jáne energııa tutynýdy azaıtý EO ekonomıkasynyń qazirgi soqqyǵa jaqsyraq daıyn bolýyna múmkindik berdi, – delingen habarlamada.
Degenmen Eýrokomıssııa táýekelderdiń áli de joǵary ekenin eskertti.
Qujatta Ormýz buǵazyndaǵy nemese Taıaý Shyǵystaǵy jetkizý tizbekterindegi uzaqqa sozylǵan qıyndyqtar energııa baǵasynyń odan ári ósýine jáne Eýropa ekonomıkasynyń qalpyna kelýin tejeıtin faktorǵa aınalýy múmkin ekeni aıtylǵan.
Sondaı-aq munaı ónimderi, tyńaıtqyshtar jáne ónerkásiptik komponentter tapshylyǵy azyq-túlik pen óndiris baǵasynyń qymbattaýyna alyp kelýi yqtımal.
Eýropa úkimetteri de bıýdjetke túsetin qysymnyń kúsheıýine daıyndalyp jatyr. Energııa baǵasynyń ósýinen halyqty qorǵaý jáne qorǵanys shyǵyndaryn arttyrý úshin kóptegen elde bıýdjet tapshylyǵy ulǵaıady dep kútiledi.
Italııa premer-mınıstri Djordja Melonı Eýrokomıssııany energııa baǵasynyń qymbattaýynan zardap shekken turǵyndar men kásiporyndarǵa qoldaý kórsetý úshin bıýdjet erejelerin jumsartýǵa shaqyrdy.
Onyń aıtýynsha, energetıkalyq qaýipsizdik qorǵanys máselesimen birdeı deńgeıde qarastyrylýy tıis.
Aıta keteıik, Frantsııa NATO-nyń Ormýz buǵazyndaǵy mıssııaǵa qatysý múmkindigin joqqa shyǵardy.
