EO-nyń taǵy bir eli bıyldan bastap eýroǵa kóshedi
ASTANA. KAZINFORM — Bolgarııa 2026 jylǵy 1 qańtardan bastap ulttyq valıýta — levpen resmı túrde qoshtasyp, eýrony memlekettik valıýta retinde engizedi.
Novinata basylymynyń málimetinshe, el Eýroaımaqqa qosylady. Bul — barlyq qajetti talapty oryndaý jolyndaǵy uzaq jylǵy kúsh-jigerdiń nátıjesi.
2026 jylǵy 1 qańtardan bastap eýro Bolgarııanyń resmı valıýtasy retinde levti birtindep almastyrady. Bir aı boıy eki valıýta qatar qoldanylady. Levpen tólem jasalǵan jaǵdaıda, qaıtarym aqsha eýromen beriledi. Bul levti aınalymnan kezeń-kezeńimen shyǵarýǵa múmkindik beredi.
Lev pen eýrodaǵy baǵany qatar kórsetý 2025 jylǵy 8 tamyzdan bastap mindetti bolyp engizildi jáne 2026 jylǵy 8 tamyzǵa deıin qoldanylady.
Kommertsııalyq bankter Bolgarııa ulttyq bankinen (BUB) eýro banknottary men tıyndaryn aldyn ala alyp, qolma-qol eýrony dúkender men kásiporyndarǵa jetkizdi. Eýro banknottary men tıyndaryn BUB-ta, kommertsııalyq bankterde jáne kommertsııalyq bank joq aýyldyq jerlerdegi kez kelgen poshta bólimshesinde aıyrbastaýǵa bolady.
Bolgarııa ulttyq bankinde aıyrbastaý tegin jáne merzimmen shektelmeıdi. Bankter men poshta bólimshelerinde aıyrbastaý alǵashqy alty aıda tegin bolady. 2026 jylǵy 1 shildeden keıin bankter men poshta bólimsheleri aıyrbastaý úshin komıssııa alýy múmkin.
1 qańtardan bastap Bolgarııadaǵy bankomattardyń 96%-y eýro banknottaryn beredi, al qalǵandary eki apta ishinde eýro berýge kóshedi.
Bolgarııa bıligi eldiń Eýroaımaqqa qosylýyna aýqymdy daıyndyq júrgizdi. Ulttyq kóshý jospary aıasynda eýrony engizý jáne levti aınalymnan shyǵarý úderisiniń barlyq uıymdastyrýshylyq tetigi egjeı-tegjeıli sıpattalǵan.
Eýro bolgar azamattary men kásiporyndary úshin birqatar praktıkalyq artyqshylyq ákeledi.
Ol shetelge sapardy jáne kúndelikti ómirdi jeńildetip, naryqtardyń ashyqtyǵy men básekege qabilettiligin arttyrady, sondaı-aq saýdany damytýǵa yqpal etedi.
Bolgarııanyń eýroǵa kóshý josparynyń basty qaǵıdaty — tutynýshylardy qorǵaý. Tutynýshylar úshin qaýipsiz orta qalyptastyrý tetikteri úsh negizgi baǵytqa negizdelgen:
— baǵany eki valıýtada qatar kórsetý;
— taýarlar men qyzmetterdiń baǵasyn baqylaý;
— saýdagerler men qyzmet kórsetýshilerge qadaǵalaý júrgizý.