EO-nyń syrtqy ister jónindegi joǵarǵy ókili 28 naýryzda Qazaqstanǵa keledi

ASTANA. KAZINFORM – Eýropalyq Odaqtyń (EO) syrtqy ister jáne qaýipsizdik saıasaty jónindegi Joǵarǵy ókili – Eýropalyq komıssııanyń vıtse-prezıdenti Kaıa Kallas Túrikmenstanǵa, Ózbekstanǵa jáne Qazaqstanǵa saparmen keledi, dep habarlaıdy EO-nyń Qazaqstandaǵy Ókildigi.

27 naýryzda Kaıa Kallas Ashhabadta ótetin 20-shy EO – Ortalyq Azııa mınıstrlik kezdesýine tóraǵalyq etedi. Bul jıynǵa Qyrǵyzstan, Tájikstan, Túrikmenstan, Ózbekstan jáne Qazaqstannyń ókilderi qatysady.

Kezdesý barysynda taraptar 2025 jylǵy 3–4 sáýirde Samarqandta (Ózbekstan) ótetin alǵashqy EO – Ortalyq Azııa sammıtine daıyndyq máselelerin talqylaıdy.

Sonymen qatar, aımaq úshin mańyzdy birqatar taqyryptar, sonyń ishinde Reseı – Ýkraına soǵysynyń óńirlik saldary, kólik jáne tsıfrlyq baılanys, mańyzdy shıkizat resýrstary, energetıka jáne sý resýrstary, saýda, halyqaralyq baılanystar, bilim jáne ǵylymı zertteýler talqylanady.

Jıyn qarsańynda Joǵarǵy ókil Túrikmenstannyń syrtqy ister mınıstri Rashıd Meredovpen, Tájikstannyń syrtqy ister mınıstri Sırodjıddın Mýhrıddınmen, sondaı-aq Túrikmenstan prezıdenti Serdar Berdimuhamedovpen jeke kezdesýler ótkizedi.

Mınıstrlik kezdesýiniń qorytyndysy boıynsha 27 naýryz kúni saǵat 14:45 shamasynda Kaıa Kallas qatysatyn baspasóz konferentsııasy ótedi.

Joǵarǵy ókil Tashkentke baryp, Ózbekstannyń syrtqy ister mınıstri Bahtıer Saıdovpen jáne prezıdent Shavkat Mırzıeevpen kezdesedi.

Osydan keıin, 28 naýryzda Almatyǵa kelip, Qazaqstannyń syrtqy ister mınıstri Murat Nurtileýmen jáne Qazaqstan Prezıdenti Qasym-Jomart Toqaevpen kelissózder ótkizedi.

Buǵan deıin Eýropalyq Odaq pen Qazaqstan arasynda mańyzy eki kelisimge qol qoıylǵanyn jazǵanbyz.