EO-nyń shıkizat aptalyǵynda alǵash ret Ortalyq Azııaǵa arnalǵan sessııa uıymdastyryldy
ASTANA.KAZINFORM - Qazaqstan Respýblıkasynyń ónerkásip jáne qurylys vıtse-mınıstri Raqymjan Isaqulov bastaǵan qazaqstandyq delegatsııa Brıýsselde ótken jyl saıynǵy shıkizat aptalyǵyna qatysty, dep habarlaıdy Kazinform menshikti tilshisi.
«Shıkizat aptalyǵy» - Eýropalyq Komıssııa uıymdastyrǵan joǵary deńgeıli forým, onda Eýropadaǵy mańyzdy shıkizat jetkizý tizbegi jáne EO-nyń osy saladaǵy basqa eldermen seriktestigi talqylanady.
Bıylǵy is-sharaǵa álemniń túkpir-túkpirinen kelgen memlekettik organdardyń, ǵylymı-zertteý jáne akademııalyq ortanyń 1000-nan astam ókili qatysty. Spıkerler arasynda Eýropalyq Komıssııanyń atqarýshy vıtse-prezıdenti Stefan Sejýrne jáne Eýropalyq komıssar Iozef Sıkela boldy.
Qazaqstan shıkizat aptalyǵyna Eýropalyq Odaqtyń Ortalyq Azııadaǵy mańyzdy shıkizat salasyndaǵy jetekshi seriktesi retinde únemi qatysady.
Aptalyqqa alǵash ret EO-nyń Ortalyq Azııa elderimen yntymaqtastyǵyna arnalǵan bólek bólim engizildi. Eýropalyq Komıssııanyń tıisti dırektsııalarynyń, sondaı-aq Qazaqstan men Ózbekstan mınıstrlikteriniń ókilderi sırek kezdesetin jer metaldary salasyndaǵy yntymaqtastyq perspektıvalary boıynsha pikir almasyp, baǵa berdi.
Vıtse-mınıstr R. Isaqulov óz sózinde sırek kezdesetin jer metaldary salasyndaǵy qazirgi jaǵdaı men onyń damý áleýetin atap ótti. Qatysýshylar sondaı-aq 2025–2026 jyldarǵa arnalǵan Jol kartasynyń nátıjelerin jáne 2026–2027 jyldarǵa arnalǵan Jol kartasyndaǵy jańa tarmaqtardy talqylady.
Forým aıasynda qazaqstandyq delegatsııa ókilderi yntymaqtastyqqa jáne Qazaqstandaǵy ınvestıtsııalyq jobalardy júzege asyrýǵa qyzyǵýshylyq tanytqan eýropalyq kompanııalar men uıymdarmen kezdesýler ótkizdi.
Biz buǵan deıin AQSh-tyń sırek kezdesetin metaldar arqyly Qytaıǵa táýeldiligin azaıtý nıeti týraly habarlaǵan edik.