EO-nyń Qytaıdan kólik ımporty alǵash ret eksporttan kóp boldy
ASTANA. KAZINFORM - Eýropalyq odaqqa Qytaıdan ákelingen avtokólikter kólemi alǵash ret Eýropanyń Qytaıǵa eksporttaǵan avtokólikterinen asyp tústi. Bul týraly Ernst & Young halyqaralyq aýdıt jáne konsaltıng kompanııasy málimdedi, dep jazady Armenpress.
Kompanııa derekterine sáıkes, 2025 jyly Eýropadan Qytaıǵa jetkizilgen avtokólikter men bólshekter kólemi 34 paıyzǵa tómendep, 16 mıllıard eýrony qurady. Osylaısha, 2022 jyldan beri Eýropanyń Qytaıǵa avtokólik eksporty eki eseden astam qysqarǵan.
Al keri baǵytta ósim baıqalady. Qytaıdan Eýropalyq odaqqa avtokólik ımporty 8 paıyzǵa artyp, 22 mıllıard eýroǵa jetken.
Germanııa boıynsha da uqsas úrdis baıqalady. Nemis óndirýshileriniń eksporty ázirge Qytaıdan keletin ımporttan joǵary bolǵanymen, aıyrmashylyq jyldam qysqaryp keledi. 2022 jylmen salystyrǵanda Germanııanyń Qytaıǵa eksporty shamamen 30 mıllıard eýrodan 13,6 mıllıard eýroǵa deıin azaıǵan. Al Qytaıdan Germanııaǵa avtokólik ımporty osy kezeńde úshten ekige ósip, 7,4 mıllıard eýroǵa jetken.
Ernst & Young sarapshysy Konstantın Galldyń aıtýynsha, Volkswagen, Mercedes-Benz jáne BMW sekildi nemis avtokontsernderi ázirge óz naryq úlesin saqtap otyr. Alaıda Qytaı tarapynan báseke kúsheıip, Germanııadaǵy avtonaryq daǵdarysy tereńdegen saıyn bul barǵan saıyn qıyndap barady.
- Eger osy úrdis saqtalsa, 2026 jyly ımport pen eksport kólemi teńesýi múmkin, — delingen kompanııa taldaýynda.
Sarapshylardyń pikirinshe, Qytaımen básekeniń kúsheıýi men saladaǵy daǵdarys byltyrdyń ózinde-aq áserin tıgizgen. 2025 jyly Germanııa avtoónerkásibiniń tabysy 1,6 paıyzǵa tómendep, shamamen 528 mıllıard eýrony qurady. Sonymen qatar saladaǵy jumys oryndary 50 myńǵa jýyq qysqarǵan.
Qazir Germanııanyń avtokólik ónerkásibinde shamamen 725 myń adam jumys isteıdi. Bul sońǵy 14 jyldaǵy eń tómen kórsetkish. Daǵdarys ásirese avtokomponentter óndirýshilerine qatty áser etken: bul sektorda tabys 4 paıyzǵa azaıyp, jumyspen qamtý 10 paıyzdan astam qysqarǵan.
Osyǵan deıin Qytaıdyń avtonaryǵy aqpan aıynda eki jyldyq mınımýmdy jańartqanyn jazdyq.