EO-nyń Qazaqstanǵa vıza rejımin jeńildetýge arnalǵan kelisim qashan bekitiledi

ASTANA. KAZINFORM — Eýropa odaǵymen vıza rejımin jeńildetý boıynsha Qazaqstan belsendi kelissózderdi jalǵastyryp jatyr. Bul týraly Syrtqy ister mınıstriniń birinshi orynbasary Aqan Rahmetýllın málim etti. 

Astana halyqaralyq forýmy aıasynda tilshiler Eýropa odaǵymen arada vıza rejımin jeńildetý múmkindigi týraly surady.

— Qazir tıisti jumystar istelir jatyr. Naqty qashan sheshiletini týraly merzimdi aıta almaımyn. Atap aıtqanda, kelissózder qarqyndy júrip jatyr, — dedi Aqan Rahmetýllın.

Onyń aıtýynsha, atalǵan kelisim aıasynda vıza rejımi aıtarlyqtaı jeńildeıdi. Konsýldyqtarǵa barǵan Qazaqstan azamattarynan suralatyn qujattar tizimi qysqartylady.

— Máselen, 10 qujattyń ornyna 2-3 qujatty tapsyrylady. Sonymen qatar vızanyń beriletin merzimi de uzartylýy múmkin, — dedi Syrtqy ister mınıstriniń birinshi orynbasary.

Atap aıtqanda, 2025 jylǵy 27 naýryzda Eýropa Odaǵyna múshe memleketter Qazaqstanmen vıza berýdi jeńildetý jónindegi kelisimdi jasaý úshin Eýropalyq komıssııanyń mandatyn maquldady. Qazaqstan — Eýropa Odaǵymen vızalyq rejımdi jeńildetý týraly kelissózderdi bastaıtyn Ortalyq Azııadaǵy alǵashqy memleket. Bul ózgerister otandastarymyzdyń Eýropaǵa saparlaryn jeńildetip, bıznes, ǵylym jáne mádenı almasýǵa jańa múmkindikter ashady.

Eske salsaq, 2023 jyly Qazaqstan men EO vıza rejımin jeńildetý boıynsha resmı kelissózderdi bastaıtynyn jazǵan edik. 

Budan buryn habarlanǵandaı, bıyl naýryz aıynyń aıaǵynda Qazaqstan Prezıdenti Qasym-Jomart Toqaev Eýropa Odaǵynyń Syrtqy ister jáne qaýipsizdik saıasaty jónindegi Joǵarǵy ókili — Eýropalyq komıssııanyń vıtse-prezıdenti Kaıa Kallaspen kezdesti. 

EO Joǵarǵy ókili Kaıa Kallas Eýropalyq komıssııa men Qazaqstan arasynda vıza berý tártibin jeńildetý jónindegi kelisimdi bekitý úderisi bastalǵanyn aıtty.