EO-nyń Izraılge qarsy sanktsııa engizý máselesi ashyq kúıinde qalyp otyr
ACTANA. KAZINFORM - Dıplomattardyń aıtýynsha, Palestına anklavyndaǵy jaǵdaı Izraıl bıligine qysymdy jeńildetý úshin tym názik, dep habarlaıdy Euronews.
Eýroodaqtyń Izraılge qarsy sanktsııa engizýi týraly másele Gaza sektorynda naqty jáne turaqty ózgerister bolǵanǵa deıin ashyq kúıinde qalyp otyr. Bul týraly EO syrtqy saıasat jónindegi Joǵarǵy ókili Kaıa Kallas Lıýksembýrgte EO elderiniń SІM basshylarymen ótken kezdesý barysynda málimdedi.
- Atysty toqtatý jaǵdaıdy ózgertti, bul bárine túsinikti. Alaıda eger biz jergilikti jerlerde naqty jáne turaqty ózgeristerdi, sonyń ishinde Gazaǵa túsetin kómek kóleminiń ulǵaıýyn kórmesek, sanktsııa qaýpi saqtalady, - dedi EO syrtqy saıasat jónindegi Joǵarǵy ókili Kaıa Kallas.
Kallastyń aıtýynsha, EO-nyń Izraılge qarsy sanktsııalaryn alyp tastaýynyń basqa sharttaryna jýrnalıster men gýmanıtarlyq qyzmetkerlerdiń Gaza sektoryna kirýi, sondaı-aq úkimettik emes uıymdardyń shekteýsiz tirkelýi kiredi.
Ótken aıda Eýropalyq komıssııa tóraǵasy Ýrsýla fon der Lıaıen Izraılmen qarym-qatynasty shekteýdi, onyń úkimetiniń birneshe múshesine sanktsııa salýdy jáne Izraıldiń EO-men seriktestik kelisimin toqtatýdy usyndy.
Aıta keteıik, 10 qazandaǵy atysty toqtatý kelisimine qaramastan 19 qazanda Izraıl áskeri Gaza sektorynyń soltústigindegi Djabalııa aımaǵyna áýeden soqqy berdi.
Izraıl Gazaǵa birneshe ret soqqy bergennen keıin atysty toqtatý rejımin jańartty.
Izraıldiń Gaza sektoryna jasaǵan áýe soqqylarynan sońǵy táýlikte qaza tapqandar sany 44-ke jetti.
HAMAS kepilge alynǵan taǵy bir adamnyń denesin Izraılge tapsyrdy.