EO-nyń bes eli zańsyz mıgranttardy úshinshi elderge jiberýdiń jańa júıesin ázirlep jatyr
ASTANA. KAZINFORM – Danııa, Aýstrııa, Germanııa, Nıderland jáne Grekııa Eýropalyq odaqtan tys elderde zańsyz mıgranttarǵa arnalǵan «qaıtarý ortalyqtaryn» qurýdyń ortaq modelin ázirledi, dep habarlaıdy Euronews.
Bul týraly bes eldiń ishki ister mınıstrleriniń Kopengagende ótken kezdesýinen keıin málim boldy. Olar 2027 jylǵa qaraı alǵashqy zańsyz mıgranttardy EO aýmaǵynan tys ornalasqan ortalyqtarǵa jiberýge daıyn bolýdy josparlap otyr.
«Qaıtarý ortalyqtaryna» osy bes elden baspana surap, ótinishi qabyldanbaǵan, biraq shyqqan eline qaıtarý múmkin bolmaǵan adamdar ornalastyrylmaq.
Qazir bes memleket mundaı ortalyqtardy bir nemese birneshe seriktes eldiń aýmaǵynda qurý jóninde kelissóz júrgizip jatyr. Ázirge yqtımal seriktester resmı túrde jarııalanǵan joq. Alaıda birqatar BAQ Ýganda men Rýandany yqtımal nusqalardyń qataryna jatqyzady.
– Búgin qabyldanǵan qaǵıdattar aldaǵy jumystyń negizin qalaıdy. Bizdiń maqsatymyz – 2027 jylǵa qaraı alǵashqy zańsyz mıgranttardy EO-dan tys seriktes elge jiberýge daıyn bolý, – dedi Danııanyń kóshi-qon isteri jónindegi mınıstri Morten Bedskov.
Onyń aıtýynsha, mundaı ortalyqtar «túrme» nemese «qamaý lageri» bolmaıdy. Danııa mınıstri olardy seriktes elder zańsyz mıgranttarǵa jańa múmkindik beretin oryn retinde sıpattady.
Jospar boıynsha ortalyqtardy Danııa, Aýstrııa, Germanııa, Nıderland jáne Grekııa tolyq qarjylandyrady. Buǵan qosa, olar seriktes memleketterge qosymsha qarjylaı qoldaý kórsetip, kommertsııalyq kelisimder nemese basqa da yntalandyrý sharalaryn usyna alady.
Jobaǵa arnalǵan qujatta qaıtarý ortalyqtarynyń júıesi EO-ǵa kirmeıtin memlekettermen teń jáne ózara tıimdi seriktestik negizinde qurylatyny aıtylǵan.
– Bizdiń ortaq maqsatymyz – zańsyz mıgratsııany nólge deıin tómendetý, – dedi Aýstrııanyń ishki ister mınıstri Gerhard Karner.
Grekııanyń kóshi-qon máseleleri jónindegi mınıstri Tanos Plevrıstiń aıtýynsha, yqtımal seriktestermen kelissózder jalǵasyp jatyr jáne talqylaýlar barǵan saıyn mazmundy sıpat alyp keledi. Ol kelisimniń jaqyn arada jarııalanatynyna úmit bildirdi.
Bes eldiń mınıstrleri qyrkúıek aıynyń sońynda Mıýnhende qaıta kezdesýdi josparlap otyr.
Bıyl maýsymda Eýroparlament EO elderine odaqqa kirmeıtin memlekettermen kelisim negizinde osyndaı qaıtarý ortalyqtaryn qurýǵa múmkindik beretin kóshi-qon týraly jańa zańdy maquldaǵan. «Qaıtarý týraly reglamenttiń» túpkilikti qabyldanýy EO elderi maquldaǵannan keıin bıylǵy kúzde kútiledi.
EO-ǵa múshe memleketterdiń basym bóligi mundaı ortalyqtardy qurýǵa qyzyǵýshylyq tanytyp otyr. Italııa qazirdiń ózinde Albanııamen birlesip osyǵan uqsas jobany júzege asyryp jatyr.
Alaıda eýropalyq qoǵamdyq jáne úkimettik emes uıymdar bul bastamany synǵa aldy.
– Adamdardy EO-dan tys jerdegi deportatsııalyq ortalyqtarǵa jiberý balalardy, eresekter men otbasylardy Eýropada qalyptastyrǵan ómirinen ajyratyp, ózderi múlde bilmeıtin jerlerde uzaq ýaqyt ustaýǵa ákeledi, – dedi qujatsyz mıgranttardyń quqyqtaryn qorǵaıtyn Brıýsseldegi PICUM uıymynyń dırektory Mıshel LeVýa.
Aıta keteıik, Seýtada mıgranttar lageri órtenip, narazylyq qaqtyǵysqa ulasty.
