EO munaı kompanııalarynyń shamadan tys paıdasyna salyq salýdy usyndy
ASTANA. KAZINFORM – Eýropalyq odaqqa múshe elderdiń qarjy mınıstrleri 18 qyrkúıekte Dýblınde beıresmı kezdesý ótkizedi. Jıynda janar-jaǵarmaı baǵasynyń qymbattaýyna baılanysty avtokólik ıelerin qoldaýdyń yqtımal sharalary talqylanady. Onyń ishinde munaı-gaz kompanııalarynyń shamadan tys paıdasyna jalpyeýropalyq salyq engizý týraly usynys ta qaralady, dep habarlaıdy Kazinform agenttiginiń Eýropalyq odaqtaǵy menshikti tilshisi.
Eýrotoptyń otyrysynda ekonomıkalyq qysym, bankterdiń básekege qabilettiligi, qarjylyq ınnovatsııalar jáne jasandy ıntellekt máseleleri de qaralady.
Atalǵan kezdesýler Irlandııa Eýropalyq odaq Keńesine tóraǵalyq etip otyrǵan kezeńde ótedi.
Germanııanyń ARD telearnasynyń habarlaýynsha, Irlandııada ótetin kezdesýde qarjy mınıstrleri salyq salý máselelerin de talqylaıdy. Germanııa ókili Lars Klıngbaıl qazirgi joǵary janar-jaǵarmaı baǵasynan paıda taýyp otyrǵan munaı kompanııalaryna shamadan tys paıda salyǵyn engizýdi qoldaıdy.
Germanııa bastamasynyń máni – baǵanyń kúrt ósýinen kompanııalar alǵan qosymsha tabystyń bir bóligin memleket alyp, azamattardy qoldaý sharalaryna baǵyttaý.
Buǵan deıin Lars Klıngbaıl Avstrııa, Italııa, Portýgalııa, Polsha jáne Ispanııadan kelgen áriptesterimen birge Irlandııanyń qarjy mınıstrine hat joldap, bul máseleni Dýblındegi kezdesýdiń kún tártibine engizýdi suraǵan. Hatta Eýropa elderi bul máselege qatysty ortaq ustanym qalyptastyrýy qajet ekeni aıtylǵan. Avtorlar daǵdarystan paıda taýyp otyrǵandar halyqtyń basym bóligine túsetin aýyrtpalyqty jeńildetýge úles qosýy kerek dep esepteıdi.
Germanııa kantsleri Frıdrıh Merts buǵan deıin kúndelikti ómirinde avtokólikke táýeldi kóptegen azamattyń shyǵyny shekten asqanyn aıtyp, bılikti áreket etýge shaqyrǵan. Alaıda Germanııa úkimetinde bul máselege qatysty biryńǵaı ustanym joq. Ekonomıka mınıstri Katarına Raıhe QQS-ty ýaqytsha tómendetip, tabysy tómen azamattarǵa tikeleı qarjylaı kómek kórsetýdi usynady.
Sarapshylar bul usynystyń júzege asatynyna kúmán keltiredi. Brıýsseldegi Bruegel taldaý ortalyǵynyń ekonomısi Georg Zahmann munaı kompanııalary tabysynyń edáýir bóligi Germanııadan tys jerde qalyptasatynyn atap ótti. Sondyqtan ulttyq bılik organdaryna oǵan salyq salý qıyn bolýy múmkin. Onyń aıtýynsha, tipti el ishinde shamadan tys paıda qalyptasqan jaǵdaıda da, kompanııalar onyń bir bóligin jasyrýy yqtımal. Sonymen qatar mundaı tabysqa zańdy ári tıimdi túrde salyq salýdyń naqty tetigin ázirleý de kúrdeli mindet bolyp qala beredi.
Eýropalyq odaq elderi 2022 jyly da shamadan tys paıdaǵa salyq engizgen bolatyn. Qazir EO-ǵa múshe ár memleket mundaı salyqty jeke ózi engize alady. Degenmen EO aýmaǵynda ortaq ishki naryq jumys isteıtindikten, keıbir taraptar salyqty jekelegen elder emes, búkil odaq kóleminde engizýdi tıimdi dep sanaıdy.
Dýblındegi kezdesýde janar-jaǵarmaı máselesimen qatar, Eýropanyń bank sektorynyń básekege qabilettiligi, tsıfrlyq eýro jobasy jáne jasandy ıntellektiniń múmkindikteri men qateri de qaralady. Baqylaýshylar benzın baǵasynyń joǵary bolýyna baılanysty biryńǵaı sheshimniń bul kezdesýde tez qabyldanýy ekitalaı ekenin aıtady.
Buǵan deıin Germanııanyń EO bıýdjetin júzdegen mıllıard eýroǵa qysqartýǵa úndegeni habarlanǵan bolatyn.
Aqzat Jıenalına
