EO mıgranttardy úshinshi elderge qaıtarý tártibin jeńildetedi

ASTANA. KAZINFORM — Eýropalyq komıssııa bosqyn mártebesin suraǵan mıgranttardy qaýipsiz dep tanylǵan úshinshi elderge qaıtarý tártibin jeńildetetin usynys jasady, dep jazady AZERTADJ.

Endi deportatsııalaý úshin mıgranttyń atalǵan elmen jeke baılanysy bolýy mindetti emes — onyń bul eldi Eýropalyq Odaqqa jol ústinde kesip ótýi jetkilikti.

Bul ózgeris EO-ǵa múshe elder men úshinshi memleketter arasynda bosqyn mártebesin berý rásimin sol elderdiń aýmaǵynda ótkizýge múmkindik beretin kelisimder jasaýǵa jol ashady. Alaıda, kámeletke tolmaǵan, eresektersiz júrgen balalardy mundaı elderge deportatsııalaýǵa tyıym salynady.

Shvetsııanyń Mıgratsııa jónindegi mınıstri Iohan Forssell bul bastamany Eýropada turaqty ári ádiletti kóshi-qon saıasatyna jasalǵan qadam ekenin aıtyp, mıgratsııalyq aǵyndy tómendetý quraly retinde oń baǵalady.

Al Amnesty International sekildi quqyq qorǵaý uıymdary usynysty synǵa aldy.

— Bul — tek retsiz jáne erikti qadam ǵana emes, sonymen qatar adamzattyq deńgeıde zııandy, — delingen olardyń baspasóz habarlamasynda.

Usynylyp otyrǵan úlgi Ulybrıtanııa men Rýanda arasyndaǵy kelisimge uqsas, sondaı-aq uqsas ıdeıalar Danııada da talqylanǵan bolatyn.

Eýrokomıssııa atap ótkendeı, mundaı kelisimder Adam quqyqtary jónindegi EO standarttaryna sáıkes bolýy tıis.

Buǵan deıin Eýrokomıssııa Túrkııanyń 2025 jylǵa arnalǵan ekonomıkalyq ósim boljamyn tómendetkenin jazdyq.