EO-men jańa keńeıtilgen kelisim Qazaqstannyń ulttyq ustanymyna saı keledi - E. Ydyrysov
ASTANA. QazAqparat - Búgin QR Parlamenti Senatynyń jalpy otyrysynda QR Syrtqy ister mınıstri Erlan Ydyrysov osylaı málimdedi. Jalpy otyrysta syrtqy saıasat vedomstvosynyń basshysy «Bir jaǵynan Qazaqstan Respýblıkasy men ekinshi jaǵynan Eýropalyq Odaqtyń jáne oǵan múshe memleketteriniń arasyndaǵy keńeıtilgen áriptestik pen yntymaqtastyq týraly kelisimdi ratıfıkatsııalaý týraly» zań jobasy boıynsha baıandama jasaǵan bolatyn.
Eske sala keteıik, kelisim Qazaqstan Prezıdenti N. Nazarbaevtyń 2008 jylǵy QR Syrtqy ister mınıstrliginiń keńeıtilgen alqa otyrysynda bergen tapsyrmasyna sáıkes ázirlengen. Qujatqa 2015 jylǵy 21 jeltoqsanda Astanada qol qoıylǵan bolatyn.
QR Syrtqy ister mınıstri Erlan Ydyrysovtyń aıtýynsha, jańa kelisim Qazaqstan men EO arasyndaǵy 1995 jyly qol qoıylyp, 1999 jyly kúshine engen qoldanystaǵy kelisimdi almastyrady. Aıta keterligi, qoldanystaǵy kelisim QR men EO arasyndaǵy yntymaqtastyqty damytý aıasyndaǵy óziniń rólin tolyq atqardy. «Jańa kelisim Qazaqstannyń Eýropalyq odaqpen qarym qatynasyn jańa, búgingi zaman talaptaryna saı, eki taraptyń da senimin aqtaıtyn ilgerimdi formatqa aýystyrýdyń berik quqyqtyq negizine aınalady. 9 bólimnen 287 baptan, saýda bóligindegi jeti qosymshadan turatyn Kelisim yntymaqtastyqtyń barlyq baǵytyn qamtıdy», - dedi E. Ydyrysov.
Onyń sózine qaraǵanda, qazirgi Eýropalyq Odaq - Qazaqstannyń asa mańyzdy ári iri saýda ekonomıkalyq áriptesi jáne ınvestory.
Taýar aınalymynyń elý paıyzy men tartylǵan sheteldik ınvestıtsııalardyń elý paıyzdan astamy EO úlesine tıesili. Al Qazaqstannyń EO jalpy taýar aınalymynyń kólemi 26-oryndy ıelene otyryp, EO-nyń basty saýda áriptesteriniń ishinde otyz iri memelketter qataryna enedi. Kelisim keshendi sıpattaǵy qujat bolyp tabylady.
«Kelisim saıası dıalogty nyǵaıtýdy arttyrady, qaǵıdatty túrde jańa baǵyttar retinde ǵaryshtyq qaýipsizdik, jappaı qyryp-joıý qarýlaryn taratýǵa qarsy kúres, terrorızmdi qarjylandyrýǵa qarsy is-qımyl, atys jáne jeńil qaraýlardyń taralymy, kıberqylmysqa qarsy sharalar, derbes málimetterdi qorǵaý, memlekettik qyzmet salasy, klımattyń ózgerýi, quqyq qorǵaý salalaryn atap ótýge bolady. Qujatta bostandyq, qaýipsizdik, ádilet jáne qaýipsizdikti qamtamasyz etý baǵytyndaǵy yntymaqtastyqqa da barynsha mán berilip otyr. EO ınnovatsııalar, ǵylym jáne tehnologııa, bilim jáne mádenıet ózara is qımyl odan ári damytylady.
«Kelisim arqyly Qazaqstan azamattary úshin vızalyq rejimdi jeńildetý, Qazaqstandy naryqtyq ekonomıkasy bar mártebesin berý, elimizdiń avıakompanııalaryn EO shekteý tiziminen shyǵarý jumystary jandana túsedi.
Qazaqstan men EO arasyndaǵy jańa kelisim elimizdiń tańdap alǵan ulttyq baǵytyna, «Qazaqstan-2050» strategııasyna, «Nurly jol» baǵdarlamasyn iske asyrýǵa, bes ınstıtýttyq reformany, Ult josparyna tolyqtaı sáıkes keledi»,- dedi vedomstvo basshysy.
