EO men QR Keńeıtilgen seriktestik týraly jańa kelisimge bıyl qol qoıylýyn asyǵa kútemiz - J. ıÝnker men D. Týsk

ASTANA. QazAqparat - Eýropalyq Keńes prezıdenti Donald Týsk pen Eýropalyq komıssııa prezıdenti Jan-Klod ıÝnker Memleket basshysy Nursultan Nazarbaevty prezıdenttik saılaýdaǵy jeńisine baılanysty quttyqtady.

Bul týraly Aqordanyń baspasóz qyzmeti habarlady.

Avtorlar óz quttyqtaýlarynda Eýropalyq Odaq Qazaqstanmen qarym-qatynasty nyǵaıtýdy jaqtaıtynyn ataı kelip, Nursultan Nazarbaevqa jáne elimizdiń halqyna tatýlyq pen baqýattylyq tilegen.

«Eýropalyq Odaq Qazaqstanmen yntymaqtastyqty odan ári kúsheıtýge jáne Keńeıtilgen seriktestik jáne yntymaqtastyq týraly jańa kelisimdi qamtı otyryp, Sizdiń basshylyǵyńyzben júrgizilip jatqan mańyzdy saıası jáne ekonomıkalyq reformalarǵa berik qoldaýdy jalǵastyrýǵa beıildi. Biz bul qujatqa múmkindiginshe bıyl qol qoıylady dep asyǵa kútemiz», - delingen hatta.

Eýopalyq Keńes pen Eýropalyq Komıssııa Qazaqstan Prezıdentiniń reforma júrgizýdegi, ásirese transparentti, esep beretin memleketti damytý baǵytyndaǵy kúsh-jigerine, sondaı-aq saılaý úderisin ári qaraı jetildirý isine qoldaý kórsetetinin atap aıtty.

«Biz taıaý jyldary saıası jáne ekonomıkalyq jańǵyrýlar Eýropalyq Odaq pen Qazaqstan arasyndaǵy qarym-qatynasty kúsheıte túsetinine senimdimiz», - delingen quttyqtaýda.