EO-men kelissóz: vıza boıynsha qandaı jeńildikter eskerilip otyr

ASTANA. KAZINFORM – Eýropa odaǵynyń Qazaqstanǵa vıza rejımin jeńildetýge arnalǵan qujat jobasynda qandaı talaptar usynylyp otyr? Bul suraqqa Syrtqy ister mınıstrligi jaýap berdi.

- 2025 jylǵy 27 naýryzda Eýropa Odaǵyna múshe memleketter Qazaqstanmen vıza berýdi jeńildetý jónindegi kelisimdi jasaý úshin Eýropalyq komıssııanyń mandatyn maquldady. Qazaqstan – Eýropa Odaǵymen vızalyq rejımdi jeńildetý týraly kelissózderdi bastaıtyn Ortalyq Azııadaǵy alǵashqy memleket. Bul – eki tarap arasyndaǵy senim men strategııalyq seriktestiktiń aıqyn belgisi, - delingen mınıstrliktiń Kazinform agenttigine bergen jaýabynda.

Atap aıtqanda, kelissózder vızalyq rejımniń negizgi aspektilerin qamtıdy. Bul turǵyda ótinishterdi qarastyrý merzimderin qysqartý, vıza qunyn tómendetý, artyqshylyqty sanattardy keńeıtý, qujattarǵa qoıylatyn talaptardy jeńildetý, sondaı-aq uzaq merzimdi kóp mártelik vızalardy alý múmkindikterin arttyrý.

- Bul ózgerister otandastarymyzdyń Eýropaǵa saparlaryn jeńildetip, bıznes, ǵylym jáne mádenı almasýǵa jańa múmkindikter ashady, - dep atalyp ótken vkdomstvo aqparatynda.

Eske salsaq, 2023 jyly Qazaqstan men EO vıza rejımin jeńildetý boıynsha resmı kelissózderdi bastaıtynyn jazǵan edik.

Budan buryn habarlanǵandaı, bıyl naýryz aıynyń aıaǵynda Qazaqstan Prezıdenti Qasym-Jomart Toqaev Eýropa Odaǵynyń Syrtqy ister jáne qaýipsizdik saıasaty jónindegi Joǵarǵy ókili – Eýropalyq komıssııanyń vıtse-prezıdenti Kaıa Kallaspen kezdesti.

EO Joǵarǵy ókili K. Kallas Eýropalyq komıssııa men Qazaqstan arasynda vıza berý tártibin jeńildetý jónindegi kelisimdi bekitý úderisi bastalǵanyn aıtty.