EO men Kanada qurǵan jańa alıansqa tórt el qosyldy
ASTANA. KAZINFORM – Eýropalyq odaq pen Kanada P4M dep atalatyn jańa halyqaralyq alıans qurýǵa daıyndalyp jatyr. Ony BUU Bas Assambleıasy aıasynda Nıý-Iorkte tanystyrady, dep habarlaıdy Bild basylymy.
Eýropalyq odaq pen Kanadadan bólek, bastamaǵa Brazılııa, Kenııa, Úndistan jáne Aýstralııa qosyldy. Alıans ashyq formatta qurylyp, bolashaqta oǵan basqa elderdiń de qosylýyna múmkindik beriledi.
P4M ataýy «Kópjaqtylyq, halyqaralyq quqyq, beıbitshilik jáne órkendeý jolyndaǵy áriptester» degendi bildiredi. Qatysýshylar halyqaralyq yntymaqtastyq pen BUU-nyń rólin nyǵaıtýdy, sondaı-aq jasandy ıntellekt, klımattyń ózgerýi jáne pandemııalarmen kúres baǵyttarynda birlesip jumys isteýdi kózdeıdi.
Bastamany kótergen elder saıası dástúrleri ártúrli memleketter arasynda «kópir ornatý» qajettigin atap otyr.
Jańa top iri derjavalar arasyndaǵy básekelestiktiń kúsheıýi jáne dástúrli halyqaralyq formattardaǵy daǵdarys jaǵdaıynda qurylyp otyr. Bolashaqta ol «Úlken jıyrmalyqqa» balama formatqa aınalýy múmkin. Qazirgi kezde G20 aıasyndaǵy yntymaqtastyqqa iri derjavalar arasyndaǵy qaıshylyqtar barǵan saıyn kedergi keltirip otyr.
Buǵan deıin Eýropalyq odaq Kanadaǵa óziniń tarıhyndaǵy alǵashqy «qaýymdastyrylǵan múshesi» bolýdy usynǵan edi. Bul mártebe ekonomıka, tehnologııa, energetıka jáne qorǵanys salalarynda erekshe tyǵyz yntymaqtastyqty kózdeıdi.
Óz kezeginde AQSh prezıdenti Donald Tramp Kanadanyń Eýropalyq odaqpen jaqyndasýyna baılanysty EO-men saýdany toqtatamyz dep qaýip tóndirgen.
Aıta keteıik, buǵan deıin Aýstralııa úkimeti eldiń Eýropalyq odaqtyń qaýymdastyrylǵan múshesi bolýy múmkin degen usynysqa túsinikteme bergenin jazdyq.
