EO men AQSh mańyzdy paıdaly qazbalar boıynsha seriktestikti kúsheıtti
ASTANA. KAZINFORM – Eýropalyq odaq pen AQSh mańyzdy paıdaly qazbalar boıynsha yntymaqtastyqty tereńdetýge baǵyttalǵan kelisimge qol qoıdy.
Qujatqa AQSh memlekettik hatshysy Marko Rýbıo men Eýrokomıssııanyń saýda jónindegi komıssary Marosh Shefchovıch Vashıngtonda qol qoıdy.
– Jetkizý tizbegindegi ártaraptandyrý asa mańyzdy. Bul mıneraldardyń bir nemese eki aımaqta shoǵyrlanýy úlken qaýip týdyrady, – dedi Marko Rýbıo.
Taraptar jartylaı ótkizgishter, elektr kólikteriniń batareıalary jáne qorǵanys salasy úshin qajet strategııalyq shıkizat jetkizilimin úılestirýge ýaǵdalasty.
– Biz birge áreket ete otyryp, maqsattarǵa burynǵydan da jyldam qol jetkizemiz jáne osy mańyzdy salada kúsheıe túsemiz, – dedi Marosh Shefchovıch.
Kelisim aıasynda taraptar sýbsıdııalar men qorlardy úılestirýdi, ortaq standarttar engizýdi jáne ǵylymı zertteýlerge birlesip ınvestıtsııa salýdy qarastyrady.
Sarapshylardyń pikirinshe, bul qadam Qytaıdyń strategııalyq mıneraldar naryǵyndaǵy yqpalyn teńgerýge baǵyttalǵan. Sebebi Beıjiń keı jaǵdaılarda jartylaı ótkizgishter men joǵary tehnologııa óndirisine qajet shıkizat eksportyna shekteý engizip keledi.
Sonymen qatar EO AQSh-pen bolat pen alıýmınııge qatysty saýda máselelerin de talqylaýda. Qazirgi tańda tarıfterge baılanysty keıbir kelispeýshilikter saqtalyp otyr.
Aıta keteıik, buǵan deıin Eýropanyń ortalyq bankteri altyn qoryn AQSh-tan áketip jatqany habarlandy.
