EO Memleket basshylary AQSh tarapynan jasalǵan elektrondyq tyńshylyq týraly habarlamalarǵa baılanysty arnaıy málimdeme qabyldady
BRıÝSSELЬ. 25 qazan. QazAqparat - Brıýsselde ótip jatqan Eýroodaqqa múshe-elder kóshbasshylarynyń sammıti barysynda AQSh tarapynan EO basshylyǵy men azamattaryna jasalǵan elektrondyq tyńshylyq týraly habarlamalarǵa baılanysty arnaıy málimdeme qabyldandy.
«Biz EO jáne AQSh arasyndaǵy áriptestik ózara qurmet pen senimge negizdelýi tıis dep oılaımyz, bul jumys ádisterine de, arnaıy qyzmetter yntymaqtastyǵyna da qatysty», - delingen málimdemede.
Eýroodaqqa múshe-elderdiń memleket jáne úkimet basshylary aqparat jınaý lańkestikke qarsy kúrestiń mańyzdy elementi bolyp tabylatynyn, alaıda senimdi joǵaltý mundaı yntymaqtastyqqa nuqsan keltirýi múmkin ekenin basa aıtty.
«EO Sammıti Frantsııa jáne Germanııa memleketteriniń aǵymdaǵy jyldyń aıaǵyna deıin osy másele boıynsha ózara túsinistikke kelý maqsatynda AQSh-pen ekijaqty kelissóz júrgizý týraly nıetin nazarǵa aldy. Bul bastamany Eýroodaqtyń basqa memleketteri de qoldady», - dep atap aıtylǵan qujatta.
Buryn QazAqparat habarlaǵandaı, Edvard Snoýden jarııa etken áshkereleý málimetteri Amerıka saıasatkerlerine kesirin tıgizýi jalǵasýda. Snoýdenniń málimetterine qaraǵanda, Amerıkanyń arnaıy qyzmetteri birden álemniń 35 eliniń kóshbasshysynyń telefondaryn tyńdap otyrǵan. Ótken aptada AQSh-tyń Parıjdegi elshisine prezıdent Fransýa Ollandtyń aldynda aqtalýyna týra keldi, sosyn AQSh prezıdenti Barak Obamanyń ózine GFR kantsleri Angela Merkeldiń aldynda aqtalýyna týra keldi.
