EO kóshbasshylary eýropalyq ınstıtýttardyń basty laýazymdaryna kandıdatýralardy talqylaıdy
ASTANA. QazAqparat - Brıýsselde Eýroodaqqa qatysýshy 28 eldiń memleket jáne úkimet basshylarynyń kezekten tys sammıti bastaldy.
Onda eýropalyq kóshbasshylar taıaý 5 jylǵa eýropalyq ınstıtýttardyń basty laýazymdaryna kandıdatýralardy talqylaıdy.
Eýroodaq kóshbasshylary jańadan bekitilgen Eýrokomıssııanyń basshysy Jan-Klod ıÝnkermen aldaǵy 2014 jyldyń 1 qarashasynan aldaǵy 5 jyldyq kezeńge jumysqa kirisetin Eýrokomıssııanyń jańartylǵan quramyn qarastyrady.
Eýrokomıssııanyń jańa basshysy Eýrokeńespen birlesip, EO-ǵa múshe memleketter usynǵan kandıdattar arasynda qyzmetter bólýi qajet. Kóshbasshylardyń basa nazar aýdaratyn laýazymnyń biri EO-nyń shetel isteri jáne qaýipsizdik saıasaty jónindegi joǵary ókili bolmaq. Qazirgi ýaqytta bul qyzmette - Ketrın Eshton. Al bul laýazymǵa basty úmitkerlerdiń biri - Italııa Syrtqy ister mınıstri Federıka Mogerını. Biraq, onyń taǵaıyndalýyna Polsha men Baltyq jaǵalaýy elderi qarsylyq tanytýda.
Halyqaralyq yntymaqtastyq jáne gýmanıtarlyq kómek jónindegi eýrokomıssar Krıstalına Georgıeva da bul qyzmetke úmitkerlerdiń qatarynda. Al Polsha ózderi tarabynan eldiń Syrtqy ister mınıstri Radoslav Sıkorskııdi usynyp otyr.
Eýrokomıssııanyń quramy aýysqannan keıin 1 aıdan soń Eýrokeńes tóraǵasy Herman Van Rompeıdiń de mandaty aıaqtalady. Degenmen, kóshbasshylar onyń izbasaryn saılaý naýqanyn jalǵyz kandıdattyń bolmaýy sebepti keıingi qaldyrýy múmkin. Bul qyzmetke úmitkerler qatarynda mynalar bar: Danııa Premer-mınıstri Helle Tornıng-Shmıtt, Gollandııa Úkimetiniń basshysy Mark Rıýtte, Estonııanyń burynǵy Premer-mınıstri Andrýs Ansıp.
