EO kóshbasshylarynyń sammıti ótetin Brıýsselge traktorlar kolonnasy kirdi
ASTANA. KAZINFORM - Búgin Eýropalyq Odaqqa múshe 27 el basshylarynyń sammıti bastalatyn Brıýsselge traktor mingen fermerler keldi.
Sársenbi kúni keshke belgııalyq fermerlerdiń alǵashqy kolonnasy Eýropalyq Odaqqa múshe 27 eldiń úkimet basshylaryna narazylyq bildirý úshin qalaǵa kirdi.
«Traktorlardyń birinshi kolonnasy Brıýsselge kirip, Eýropalyq kvartalǵa bet aldy. Kolonna ortalyqta jáne Kishi aınalma jolynda kólik qozǵalysyna kedergi keltirip tur. Namıýr jáne Lýıza týnnelderi arasyndaǵy jol qozǵalysyna shekteý qoıylǵan», - dep habarlady sársenbide jergilikti polıtsııa saıtynan.
Belgııalyq fermerler Frantsııa, Germanııa jáne EO-nyń basqa elderindegi áriptesteriniń aýqymdy narazylyq sharalaryna qosyldy. Aýyl sharýashylyǵy qyzmetkerleri alymdar men salyqtyń kóterilgenine qarsy shyǵyp otyr.
Eýroodaqtyń kezekten tys sammıti óz jumysyn saǵat 10.00-de bastaıdy. Eýropalyq kóshbasshylardyń kelissózder ústelinde EO-nyń 2027 jylǵa deıingi kópjyldyq qarjylyq josparyn qaıta qaraý máselesi bar. Qujat EO-nyń barlyq múshesiniń biraýyz sheshimimen qabyldanýy tıis. Alaıda ótken jyldyń jeltoqsanynda Eýroodaq basshylary Eýroodaq bıýdjeti boıynsha kelise almady, osyǵan baılanysty kezdesý 1 aqpanǵa belgilendi.
Kelisimde Ýkraınaǵa kómek kórsetý, zańsyz kóshi-qonmen kúresý sharalaryn kúsheıtý, shekarany qorǵaý jáne tabıǵı apattarǵa birlesip áreket etý baǵdarlamalaryna qosymsha qarajat qarastyrylǵan.
Sonymen qatar Eýroodaq músheleri Taıaý Shyǵystaǵy jaǵdaıdy talqyǵa salmaq. Eýropalyq keńes basshysy Sharl Mıshel Taıaý Shyǵystaǵy dramalyq oqıǵalar EO-nyń barynsha nazar aýdarýyn talap etetinin atap ótti.
«HAMAS» kepilge alǵan barlyq adam eshqandaı alǵyshartsyz bosatylýy kerek. Budan basqa, biz Gazadaǵy kúrdeli gýmanıtarlyq jaǵdaıdy túzetý úshin shuǵyl túrde úlesimizdi qosýymyz tıis. Biz ızraıldikter de, palestınalyqtar úshin de turaqty beıbitshilikti qamtamasyz ete alatyn jalǵyz ómirsheń nusqa – eki memlekettiń qatar ómir súrýine negizdelgen saıası protsesti qalaı jandandyrý kerektigin talqylaýymyz kerek. Jalpy, bizdiń kúsh-jigerimiz barlyq adamnyń halyqaralyq quqyq pen halyqaralyq gýmanıtarlyq quqyq normalaryn saqtaýyn qamtamasyz etýge baǵyttalýy tıis», - dedi Sh.Mıshel.
