EO Kongodaǵy Ebola indetimen kúreske qosymsha 5 mln eýro bóledi
ASTANA. KAZINFORM – Eýropalyq odaq Kongo Demokratııalyq Respýblıkasynda taralyp jatqan Ebola indetimen kúreske qosymsha 5 mıllıon eýro bólmek. Qarajat aýrýdy anyqtaý men epıdemıologııalyq baqylaýdy kúsheıtýge baǵyttalady, dep habarlaıdy Euronews.
Daǵdarysty basqarý jónindegi eýrokomıssar Hadja Labıb óńirge jasaǵan sapary barysynda bólinetin qarjy eń kóp zardap shekken provıntsııalardaǵy zerthanalyq bazany nyǵaıtýǵa jáne dıagnoz qoıý úderisin jedeldetýge jumsalatynyn aıtty.
Dúnıejúzilik densaýlyq saqtaý uıymynyń málimetinshe, Kongoda Ebola vırýsyn juqtyrýdyń 450-den astam rastalǵan jaǵdaıy tirkelip, ondaǵan adam qaıtys bolǵan. Qalyptasqan ahýal halyqaralyq mańyzy bar qoǵamdyq densaýlyq saqtaý salasyndaǵy tótenshe jaǵdaı retinde baǵalanǵan.
Buǵan deıin DDU men Afrıkanyń aýrýlardy baqylaý jáne aldyn alý ortalyǵy indetke qarsy kúreske arnalǵan quny shamamen 450 mıllıon eýro bolatyn jospardy iske qosqan edi.
– Eýropalyq odaq bul tótenshe jaǵdaıǵa óte baıyppen qaraıdy. Іndet bastalǵan sátten bastap biz dereý áreket etip, qoldaý kórsetý úshin óńirge jedel jettik. Bul baǵyttaǵy mindettememiz áli de jalǵasýda, – dedi Hadja Labıb.
Onyń aıtýynsha, EO gýmanıtarlyq kómek pen logıstıkalyq qoldaýdy kúsheıtip jatyr. Óńirge ondaǵan tonna medıtsınalyq júk jetkizilgen, al aldaǵy ýaqytta qosymsha gýmanıtarlyq reıster jiberiledi.
– Tórt aı buryn munda kelgenimde barlyq qaýip faktorlary anyq baıqaldy: sanıtarlyq jaǵdaıdyń nasharlyǵy, densaýlyq saqtaý júıesiniń álsizdigi, halyqtyń qajýy jáne qarýly qaqtyǵystar saldarynan úılerin tastap ketýge májbúr bolǵan adamdar. Munyń bári indettiń qaıta órshýine qolaıly jaǵdaı qalyptastyrady, – dedi eýrokomıssar.
Jaǵdaıdy eldiń shyǵysyndaǵy qarýly qaqtyǵystar, halyqtyń jappaı qonys aýdarýy jáne densaýlyq saqtaý júıesiniń álsizdigi kúrdelendirip otyr.
DDU tıimdi sharalar qabyldanbasa, bul indet tarıhtaǵy eń iri Ebola oshaqtarynyń birine aınalýy múmkin ekenin eskertti.
Mamandardy kórshiles Ýgandada da aýrý juqtyrý jaǵdaılarynyń anyqtalýy alańdatyp otyr. DDU málimetinshe, vırýs elge shekara arqyly engen. Ýganda bıligi 19 adamnyń vırýs juqtyrǵanyn jáne eki adamnyń qaıtys bolǵanyn habarlady.
– Іndettiń óńir boıynsha taralý qaýpi saqtalyp otyr, sondyqtan halyqaralyq qaýymdastyqtyń qoldaýy burynǵydan da mańyzdy, – dedi DDSU ókilderi.
Aıta keteıik, Berlın dárigerleri Ebola juqtyrǵan amerıkalyqty emdep shyǵardy.
