EO Qyzyl teńizdegi qaýipsizdik sharalaryn kúsheıtedi
ASTANA. KAZINFORM – Eýropalyq odaq Iran qoldaý kórsetetin hýsıtterdiń Bab-el-Mandeb buǵazyn jabýǵa daıyndalyp jatqany týraly habarlamalar aıasynda Qyzyl teńizdegi qaýipsizdik mıssııalaryn kúsheıtip jatyr, dep habarlaıdy Euronews.
Basylymnyń málimetinshe, arab tilinen aýdarǵanda «Kóz jasy qaqpasy» degendi bildiretin Bab-el-Mandeb buǵazy – Arab túbegindegi Iemendi Afrıka múıisindegi Djıbýtı men Erıtreıadan bólip turǵan, eń tar jeri shamamen 30 shaqyrym bolatyn buǵaz.
Osy buǵaz arqyly álemdik teńiz tasymalynyń shamamen 10–15 paıyzy, onyń ishinde Eýropaǵa jetkiziletin munaı men gazdyń edáýir bóligi ótedi. Eger buǵaz jabylsa, kemeler Afrıkanyń Qaıyrly úmit múıisin aınalyp ótýge májbúr bolady. Bul Azııa men Eýropa arasyndaǵy teńiz qatynasyn 2–3 aptaǵa uzartyp, júk tasymalynyń qunyn edáýir arttyrýy múmkin.
EO-nyń syrtqy ister jáne qaýipsizdik saıasaty jónindegi joǵary ókili Kaıa Kallas beısenbi kúni Djıbýtıge sapary barysynda Qyzyl teńizdegi qaýipsizdikti qamtamasyz etip jatqan Aspides jáne Atalanta áskerı-teńiz mıssııalaryna bardy.
Sapar barysynda Kaıa Kallas Djıbýtı úkimetimen Aspides operatsııasy boıynsha kúshterdiń mártebesine qatysty jańa kelisimge qol qoıdy. Bul kelisim Eýropanyń óńirdegi qaýipsizdik salasyndaǵy qatysýyn kúsheıtýge baǵyttalǵan.
Kallastyń aıtýynsha, hýsıtterdiń jýyrdaǵy Saýd Arabııasyna jasaǵan zymyran shabýyldary qurlyqtaǵy turaqsyzdyqtyń teńizdegi qaýipsizdikke de tikeleı áser etetinin kórsetedi.
Basylymnyń habarlaýynsha, Kaıa Kallastyń sapary Irannyń AQSh eldiń ınfraqurylymyna soqqy bergen jaǵdaıda hýsıtterge Bab-el-Mandeb buǵazyn jabýǵa daıyndalýdy tapsyrǵany týraly aqparatpen tuspa-tus keldi.
Eske salaıyq, qaqtyǵys geografııasy Parsy shyǵanaǵy elderin, Irakty, Sırııany jáne Ormýz buǵazyn da qamtyp, keńeıip keledi.
