EO Qytaıǵa táýeldilikti azaıtady: sırek metaldardy jetkizý boıynsha jańa strategııa ázirlenip jatyr

ASTANA. KAZINFORM – Eýropalyq komıssııa Eýropalyq Odaqtyń Qytaıǵa táýeldiligin azaıtý maqsatynda sırek jer metaldary men ózge de strategııalyq mańyzdy materıaldardy ımporttaý boıynsha jańa strategııa ázirlep jatyr, dep habarlaıdy Bild.

Berlındegi konferentsııada Eýrokomıssııa tóraıymy Ýrsýla fon der Lıaıen atap ótkendeı, bul bastamanyń maqsaty — eýropalyq ónerkásiptiń qysqa jáne uzaq merzimdi perspektıvada asa mańyzdy shıkizattyń balama kózderine qoljetimdiligin qamtamasyz etý. Jańa strategııa Reseı energetıkalyq resýrstarynyń jetkizilimi toqtaǵannan keıin Eýroodaqtyń energetıkalyq daǵdarysty eńserýine múmkindik bergen baǵdarlama úlgisimen jasalyp jatyr.

Basty baǵyttardyń biri qaıta óńdeý salasyn damytý bolmaq.

— Keıbir kompanııalar sırek jer elementteri men akkýmýlıatorlardyń 95%-ǵa deıinin qaıta óńdeı alady, — dedi fon der Lıaıen.

Sonymen qatar, Brıýssel shıkizatty óndirý jáne jetkizý salasynda birqatar eldermen, sonyń ishinde Ýkraına, Kanada, Avstralııa, Qazaqstan, Ózbekstan, Chılı jáne Grenlandııamen yntymaqtastyq jónindegi kelisimder jasaýdy josparlap otyr.

Buǵan deıin habarlanǵandaı, Qytaı jeke derekterdiń berilýin baqylaýdy kúsheıtip jatyr.

Aıta ketelik Qytaı Eýropalyq Odaqtan keletin alkogol ónimderine salyqty ósirgen edi.